തിരുവനന്തപുരം: സംസ്ഥാനത്തിന്റെ വികസനവും പുരോഗതിയും തടസ്സപ്പെടുത്തുന്ന കേന്ദ്ര നയങ്ങൾക്കെതിരെ ഇടതുപക്ഷ ജനാധിപത്യ മുന്നണി (എൽഡിഎഫ്) സെപ്റ്റംബർ 21 ന് ഗവർണർ ആരിഫ് മുഹമ്മദ് ഖാന്റെ ഔദ്യോഗിക വസതിയായ തിരുവനന്തപുരത്ത് രാജ്ഭവനു മുന്നിൽ പ്രതിഷേധിച്ചു.
മാസങ്ങൾക്ക് മുമ്പ് കേരള നിയമസഭ പാസാക്കിയ ചില സുപ്രധാന ബില്ലുകളിൽ ഗവർണർ ഒപ്പുവെച്ചില്ലെന്നും ഭരണകക്ഷിയായ ഇടതുമുന്നണി കുറ്റപ്പെടുത്തി.
“കേന്ദ്ര സര്‍ക്കാര്‍ കേരളത്തെ സാമ്പത്തികമായി ഞെരുക്കുകയാണ്. നിരവധി ചർച്ചകൾക്കും സംവാദങ്ങൾക്കും ശേഷം നിയമസഭ പാസാക്കിയ ബില്ലുകൾ ഗവര്‍ണ്ണര്‍ പിടിച്ചുവെച്ചിരിക്കുകയാണ്,” എല്‍ ഡി എഫ് കണ്‍‌വീനര്‍ ഇ പി ജയരാജന്‍ പറഞ്ഞു.
പ്രതിപക്ഷമായ കോൺഗ്രസ് നേതൃത്വത്തിലുള്ള യുണൈറ്റഡ് ഡെമോക്രാറ്റിക് ഫ്രണ്ടിനെയും (യുഡിഎഫ്) ജയരാജൻ വെറുതെ വിട്ടില്ല. അവര്‍ കേരളത്തിൽ സർക്കാർ ആരംഭിച്ച വികസന പ്രവർത്തനങ്ങളെ പിന്തുണയ്ക്കുന്നില്ലെന്ന് ആരോപിച്ചു. സംസ്ഥാനത്തെ വികസനം തടസ്സപ്പെടുത്താൻ യുഡിഎഫ് സജീവമായി പ്രവർത്തിക്കുന്നുണ്ടെന്നും അദ്ദേഹം ആരോപിച്ചു.
കേരളത്തിലെ ജനങ്ങളുടെ ക്ഷേമത്തിനും പുരോഗതിക്കും വേണ്ടിയാണ് ഇവിടുത്തെ എൽഡിഎഫ് സർക്കാർ എക്കാലവും പ്രവർത്തിക്കുന്നത്. കഴിഞ്ഞ പിണറായി വിജയൻ ഭരണകാലത്തും ഇപ്പോഴുള്ള ഭരണകാലത്തും അത് തുടരുന്നു. ഇടത് സർക്കാരിന്റെ ശ്രമഫലമായി സംസ്ഥാനത്തുണ്ടായ പുരോഗതി ബിജെപിയെയും യുഡി‌എഫിനെയും ഭയപ്പെടുത്തുന്നു. ബി.ജെ.പിയും യു.ഡി.എഫും ചില കാരണങ്ങളാൽ ഒന്നിക്കുന്ന കാഴ്ചയാണ് കാണുന്നത്. കേരളത്തിലെ പുരോഗതിയെയും വികസനത്തെയും എതിർക്കുന്ന ഒരേ നിലപാടാണ് ഇരുവരും സ്വീകരിച്ചതെന്നും സമരത്തിന് എത്തിയ നൂറു കണക്കിനാളുകൾക്ക് മുന്നിൽ അദ്ദേഹം ആരോപിച്ചു.
എൽഡിഎഫിന്റെ സംസ്ഥാന നേതാക്കളും തിരുവനന്തപുരം ജില്ലയിലെ ജനപ്രതിനിധികളും പ്രതിഷേധത്തിൽ പങ്കെടുത്തു.
കേരളത്തിൽ വന്ദേഭാരത് ട്രെയിനിന്റെ പ്രവർത്തനവും വിഴിഞ്ഞം തുറമുഖത്തിന്റെ നിർമ്മാണവും എല്ലാം എൽഡിഎഫ് സർക്കാരിന്റെ ശ്രമഫലമായാണ് ഉണ്ടായതെന്ന് ജയരാജൻ വാദിച്ചു.
ജനങ്ങളുടെ പ്രയോജനത്തിനും സംസ്ഥാനത്തിന്റെ പുരോഗതിക്കും വേണ്ടിയാണ് നിയമസഭ വിവിധ ബില്ലുകൾ പാസാക്കുന്നതെന്നും എന്നാൽ അവയിൽ പലതിന്റെയും അംഗീകാരം ഗവർണർ വൈകിപ്പിക്കുകയാണെന്നും അദ്ദേഹം പറഞ്ഞു.
ലോക് ആയുക്ത ഭേദഗതി ബിൽ, രണ്ട് വ്യത്യസ്ത സർവകലാശാലാ നിയമ ഭേദഗതി ബില്ലുകൾ തുടങ്ങി നിരവധി ബില്ലുകൾ പിടിച്ചുവെച്ചിരിക്കുന്ന ഗവര്‍ണ്ണറുടെ നടപടിയെ ജയരാജൻ ചോദ്യം ചെയ്യുകയും അത് ജനാധിപത്യ വിരുദ്ധമാണെന്നും ആരോപിച്ചു.
ചില ബില്ലുകളിൽ ഗവർണർ ഒപ്പിടാത്തത് ബിജെപി ഭരിക്കുന്ന കേന്ദ്രത്തിന്റെ നയങ്ങൾ അനുസരിച്ചാണെന്നും അദ്ദേഹം ആരോപിച്ചു. ബില്ലുകൾക്ക് അനുമതി നൽകിയില്ലെങ്കിൽ അത് പൊതുജനങ്ങളെ സഹായിക്കില്ലെന്നും അദ്ദേഹം പറഞ്ഞു.
