ലണ്ടൻ: പഞ്ചാബിലെ തന്റെ സ്വത്ത് കണ്ടുകെട്ടലിലൂടെയും തെറ്റായ കേസുകളിലൂടെയും എസ്എഫ്ജെ നേതാവ് ഗുർപത്വന്ത് സിംഗ് പന്നൂണിനെ നിശ്ശബ്ദനാക്കാനും നിർബന്ധിക്കാനുമുള്ള ഇന്ത്യയുടെ ശ്രമങ്ങൾ ഖാലിസ്ഥാൻ റഫറണ്ടം പ്രസ്ഥാനത്തെ തടസ്സപ്പെടുത്തില്ലെന്ന് യുഎസ് ആസ്ഥാനമായുള്ള ഖാലിസ്ഥാൻ അനുകൂല സംഘടനയായ സിഖ്‌സ് ഫോർ ജസ്റ്റിസ് (എസ്എഫ്ജെ) തറപ്പിച്ചുപറഞ്ഞു.
ഖാലിസ്ഥാൻ അനുകൂല കനേഡിയൻ നേതാവും പന്നൂനിന്റെ സുഹൃത്തും മിത്രവുമായിരുന്ന ഹർദീപ് സിംഗ് നിജ്ജാറിന്റെ കൊലപാതകത്തിന് പിന്നിൽ ഇന്ത്യയാണെന്ന കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ പരസ്യവും ഞെട്ടിപ്പിക്കുന്നതുമായ ആരോപണത്തെത്തുടർന്ന്, തീവ്രവാദ പ്രവർത്തനങ്ങൾ ആരോപിക്കുന്ന പന്നൂണിന്റെ ഇന്ത്യയിലെ സ്വത്തുക്കൾ കണ്ടുകെട്ടിയതായി ഇന്ത്യയുടെ ഫെഡറൽ തീവ്രവാദ വിരുദ്ധ ഏജൻസി അറിയിച്ചതിന് പിന്നാലെയാണ് പന്നൂൻ സംസാരിച്ചത്.
ഇന്ത്യയുടെ വടക്കൻ സംസ്ഥാനമായ പഞ്ചാബിൽ പന്നൂന്റെ ഉടമസ്ഥതയിലുള്ള ഒരു വീടും സ്ഥലവും പിടിച്ചെടുത്തത് “കാനഡ ഉൾപ്പെടെയുള്ള വിവിധ രാജ്യങ്ങളിൽ നിന്ന് പ്രവർത്തിക്കുന്ന തീവ്രവാദ, വിഘടനവാദ ശൃംഖലയ്‌ക്കെതിരായ രാജ്യം അടിച്ചമർത്തുന്നതിന് വലിയ ഉത്തേജനം നൽകുന്നു” എന്ന് ഇന്ത്യൻ നാഷണൽ ഇൻവെസ്റ്റിഗേഷൻ ഏജന്‍സി (എന്‍ഐ‌എ) പുറത്തിറക്കിയ പ്രസ്താവനയിൽ പറയുന്നു.
ഖാലിസ്ഥാൻ റഫറണ്ടം വോട്ടിംഗിലൂടെ യുകെ, കാനഡ, യൂറോപ്പ്, അമേരിക്ക എന്നിവിടങ്ങളിലെ പതിനായിരക്കണക്കിന് സിഖുകാരെ അണിനിരത്തിയ ഖലിസ്ഥാൻ റഫറണ്ടം പ്രചാരണത്തിന്റെ വിജയത്തിൽ ഇന്ത്യ നിരാശയിലാണെന്നും ഞെട്ടലിലാണെന്നും എസ്എഫ്ജെ ജനറൽ കൗൺസൽ പന്നൂൻ പറഞ്ഞു.
ഇന്ത്യയുമായുള്ള സംഘർഷത്തിന്റെ കാതൽ വിഷയം ഒരു വ്യക്തിയുടെ സ്വത്തുക്കളല്ലെന്ന് പഞ്ചാബിലെ തന്റെ സ്വത്ത് എൻഐഎ കണ്ടുകെട്ടിയതിനെക്കുറിച്ച് ഗുർപത്വന്ത് സിംഗ് പന്നൂൻ പറഞ്ഞു.
“സിഖ് ജനതയുടെ – പഞ്ചാബ് – അവകാശങ്ങള്‍ ഇന്ത്യ ബലപ്രയോഗത്തിലൂടെ കൈവശപ്പെടുത്തിയിരിക്കുന്നതും, ഡൽഹിയിലുള്ളവര്‍ കൊള്ളയടിക്കുന്ന പഞ്ചാബിലെ തദ്ദേശീയരുടെ വിഭവങ്ങളുമാണ് വിഷയം. ദശലക്ഷക്കണക്കിന് ‘വോട്ടുകൾ’ ലഭിച്ചിട്ടുള്ള ഖാലിസ്ഥാൻ റെഫറണ്ടം 2025 ഇന്ത്യയ്‌ക്കെതിരായ ‘സിഖുകാരുടെ സർജിക്കൽ സ്‌ട്രൈക്ക്’ ആയിരിക്കും, അത് പഞ്ചാബിനെ മോചിപ്പിച്ച് ഡെമോക്രാറ്റിക് റിപ്പബ്ലിക് ഓഫ് ഖാലിസ്ഥാൻ (ഡിആർകെ) സൃഷ്ടിക്കും, അവിടെ എല്ലാ മതങ്ങളിലും പെട്ട ആളുകൾക്ക് തുല്യ പദവിയും അവകാശങ്ങളും സ്വാതന്ത്ര്യവും ലഭിക്കും,” പന്നൂന്‍ പറഞ്ഞു.
2020-ൽ, പന്നൂനിനെതിരെ റെഡ് കോർണർ നോട്ടീസ് (ആർസിഎൻ) പുറപ്പെടുവിക്കാൻ ഇന്ത്യ ഇന്റർപോളിനോട് ആവശ്യപ്പെട്ടിരുന്നു. എന്നാല്‍, കേസ് പരിശോധിച്ച ശേഷം, പന്നൂനുമായി ബന്ധപ്പെടുത്തുന്ന ഒരു തെളിവും ഹാജരാക്കുന്നതിൽ ഇന്ത്യ പരാജയപ്പെട്ടുവെന്നതിന്റെ അടിസ്ഥാനത്തിൽ ഇന്ത്യയുടെ അഭ്യർത്ഥന ഇന്റർപോൾ നിരസിച്ചു. ഇന്ത്യയുൾപ്പെടെ ലോകത്തെവിടെയും അക്രമം അല്ലെങ്കിൽ തീവ്രവാദ പ്രവർത്തനം അവര്‍ നടത്തുന്നില്ല എന്നായിരുന്നു ഇന്റര്‍പോളിന്റെ വാദം.
പന്നൂനിന്റെ മനുഷ്യാവകാശ പ്രവർത്തനവും രാഷ്ട്രീയ പ്രചാരണവുമായ ഖാലിസ്ഥാൻ റഫറണ്ടം കാരണമാണ് ഇന്ത്യ
അദ്ദേഹത്തിനെതിരെ ആർസിഎൻ പുറപ്പെടുവിച്ചതെന്ന് ഇന്റർപോൾ തുടർന്നു പറഞ്ഞു.
കഴിഞ്ഞ കുറച്ച് വർഷങ്ങളായി, പന്നൂനെതിരെ നടപടിയെടുക്കാൻ ഇന്ത്യ അമേരിക്കയോടും കാനഡയോടും ആവശ്യപ്പെട്ടിരുന്നു. എന്നാൽ, തെളിവുകളുടെ അഭാവവും അവകാശവാദങ്ങളെ പിന്തുണയ്ക്കുന്നതിൽ ഇന്ത്യയുടെ പരാജയവും കാരണം രണ്ട് സർക്കാരുകളും ഒരു നടപടിയും സ്വീകരിച്ചില്ല.
ഇക്കഴിഞ്ഞ ജൂണില്‍, സിഖ്‌സ് ഫോർ ജസ്റ്റിസ് എന്ന ബാനറിൽ കാനഡയിലെ ഖാലിസ്ഥാൻ റഫറണ്ടം ചാപ്റ്ററിന്റെ പ്രസിഡന്റായിരുന്ന നിജ്ജാറിന്റെ കൊലപാതകവുമായി ഇന്ത്യൻ സർക്കാർ ഏജന്റുമാരെ ബന്ധപ്പെടുത്തുന്ന വിശ്വസനീയമായ ഇന്റലിജൻസ് കാനഡയ്‌ക്ക് ഉണ്ടെന്ന് കനേഡിയൻ പ്രധാനമന്ത്രി ജസ്റ്റിൻ ട്രൂഡോ പറഞ്ഞതിനെത്തുടർന്ന് ഇന്ത്യയും കാനഡയും തമ്മിലുള്ള സംഘർഷം വർദ്ധിച്ചു. ഖാലിസ്ഥാന്‍ റഫറണ്ടം വോട്ടിംഗ് പ്രചാരണത്തിന് നേതൃത്വം നൽകിയതാണ് ഇന്ത്യയെ പ്രകോപിപ്പിച്ചതെന്നും അവര്‍ പറയുന്നു.
