അബുദാബി : 2021 മുതൽ അടച്ചിട്ടിരിക്കുന്ന ബെയ്‌റൂട്ടിലെ യുഎഇ എംബസി വീണ്ടും തുറക്കാൻ യുണൈറ്റഡ് അറബ് എമിറേറ്റ്സ് (യുഎഇ) പ്രസിഡന്റും ലെബനൻ പ്രധാനമന്ത്രിയും സമ്മതിച്ചതായി എമിറേറ്റ്സ് ന്യൂസ് ഏജൻസി (വാം) റിപ്പോർട്ട് ചെയ്തു.
ശൈഖ് മുഹമ്മദ് ബിൻ സായിദ് അൽ നഹ്യാനും നജീബ് മിക്കതിയും ഒക്ടോബർ 4 വ്യാഴാഴ്ച അബുദാബിയിലെ ഖസർ അൽ ഷാതി പാലസിൽ വെച്ചാണ് കൂടിക്കാഴ്ച നടത്തിയത്.
ലെബനീസ് പൗരന്മാർക്ക് യുഎഇയിലേക്കുള്ള പ്രവേശന വിസകൾ സുഗമമാക്കുന്നതിന് സംവിധാനം ഒരുക്കുന്നതിന് ഒരു സംയുക്ത കമ്മിറ്റി രൂപീകരിക്കാനും ഇരു കക്ഷികളും സമ്മതിച്ചു.
അബുദാബിയും ബെയ്റൂട്ടും തമ്മിലുള്ള ബന്ധം മെച്ചപ്പെടുത്തുന്നതിനുള്ള തന്ത്രങ്ങൾ മിക്കതിയും അൽ നഹ്യാനും ചർച്ച ചെയ്തു. ഇരു രാജ്യങ്ങളുടെയും താൽപ്പര്യങ്ങൾ യോജിപ്പിക്കുന്നതിന് വികസനത്തിലും സമ്പദ്‌വ്യവസ്ഥയിലും ശ്രദ്ധ കേന്ദ്രീകരിച്ചു.
കൂടിക്കാഴ്ചയിൽ, ലെബനനില്‍ സ്ഥിരതയും സുരക്ഷയും സമൃദ്ധിയും ഉണ്ടാകട്ടേ എന്ന് അൽ നഹ്യാൻ ആശംസിച്ചു.
ലെബനന്റെ ഐക്യം, പരമാധികാരം, പ്രാദേശിക സമഗ്രത, ലെബനൻ ജനതയ്ക്കുള്ള പിന്തുണ എന്നിവയിൽ യുഎഇയുടെ “അചഞ്ചലമായ” നിലപാടും അദ്ദേഹം അടിവരയിട്ടു പറഞ്ഞു.
“ശക്തവും യോജിച്ചതും സജീവവുമായ രാഷ്ട്രമായി” പ്രാദേശിക, അന്തർദേശീയ ഘട്ടങ്ങളിൽ ലെബനൻ സജീവമായ പങ്ക് വഹിക്കുന്നതായി കാണാനാണ് യുഎഇ ശ്രമിക്കുന്നതെന്നും അൽ നഹ്യാൻ സൂചിപ്പിച്ചു.
യുഎഇയുടെ പിന്തുണയ്ക്ക് മികതി നന്ദി പ്രകടിപ്പിക്കുകയും ലെബനീസ് ജനതയിൽ അത് ചെലുത്തിയ നല്ല സ്വാധീനത്തെ പ്രശംസിക്കുകയും ചെയ്തു.
ഒരു ടെലിവിഷൻ പരിപാടിയിൽ, ലെബനൻ ഇൻഫർമേഷൻ മന്ത്രി ജോർജ് കർദാഹി, യെമൻ യുദ്ധത്തിൽ സൗദി അറേബ്യയും യുഎഇയും ആക്രമണകാരികളാണെന്ന് ആരോപിച്ചിരുന്നു. ഇത് ലെബനനും ഗൾഫ് രാജ്യങ്ങളും തമ്മിലുള്ള നയതന്ത്ര പ്രതിസന്ധിക്ക് കാരണമായി. തുടര്‍ന്ന് സൗദി അറേബ്യ, കുവൈറ്റ്, യുഎഇ, ബഹ്‌റൈൻ എന്നീ രാജ്യങ്ങൾ ബെയ്‌റൂട്ട് സർക്കാരുമായുള്ള നയതന്ത്ര, വ്യാപാര ബന്ധം വിച്ഛേദിച്ചു. ലെബനനിലേക്കുള്ള യാത്രയിൽ നിന്ന് പൗരന്മാരെ വിലക്കുകയും ചെയ്തു.
