ടെൽ അവീവ്: ഹമാസിനെതിരായ യുദ്ധത്തിൽ ഐക്യദാർഢ്യം പ്രഖ്യാപിച്ച് യുഎസ് പ്രസിഡന്റ് ജോ ബൈഡൻ ബുധനാഴ്ച ഇസ്രയേലിലെത്തി.
അൽ-അഹ്‌ലി അൽ-അറബി ഹോസ്പിറ്റലിനെ വിഴുങ്ങിയ അഗ്നിഗോളം 12 ദിവസത്തെ യുദ്ധത്തിൽ നിന്നുള്ള ഏറ്റവും മാരകവും ഭയാനകവുമായ ചിത്രങ്ങളാണ് ലോകര്‍ക്ക് നല്‍കിയത്. സമാധാന ചര്‍ച്ചകള്‍ക്കായി മിഡില്‍ ഈസ്റ്റിലേക്ക് അടിയന്തരമായി യാത്ര തിരിച്ച ബൈഡന്റെ പദ്ധതികള്‍ തകിടം മറിയാന്‍ അത് കാരണവുമായി. ഗാസയില്‍ ആശുപത്രി ബോംബിട്ട് തകര്‍ത്തതിനെത്തുടര്‍ന്ന് പ്രസിഡന്റിനോടൊപ്പം അറബ് നേതാക്കള്‍ ആസൂത്രണം ചെയ്തിരുന്ന ഉച്ചകോടി അവര്‍ റദ്ദു ചെയ്തു.
500 ഓളം പേർ കൊല്ലപ്പെട്ട സ്ഫോടനത്തിന് പിന്നിൽ ഇസ്രായേൽ വ്യോമാക്രമണമാണെന്ന് ഫലസ്തീൻ അധികൃതർ ആരോപിച്ചു. ഫലസ്തീൻ ഇസ്ലാമിക് ജിഹാദ് തീവ്രവാദി സംഘടനയുടെ റോക്കറ്റ് വിക്ഷേപണം പരാജയപ്പെട്ടതാണ് സ്ഫോടനത്തിന് കാരണമായതെന്ന് ഇസ്രായേലും അവകാശപ്പെട്ട് കുറ്റം നിഷേധിക്കുകയും ചെയ്തു.
“ഇന്നലെ ഗാസയിലെ ആശുപത്രി സ്‌ഫോടനത്തിൽ ഞാൻ വളരെ ദുഃഖിതനും രോഷാകുലനുമാണ്, ഞാൻ കണ്ടതിന്റെ അടിസ്ഥാനത്തിൽ, ഇത് മറ്റവരാണ് ചെയ്തതെന്ന് തോന്നുന്നു,”ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനൊപ്പം സംസാരിച്ച ബൈഡൻ പറഞ്ഞു.
ലോകം ഉറ്റുനോക്കുന്നുണ്ടെന്നും, അമേരിക്കയും മറ്റ് ജനാധിപത്യ രാജ്യങ്ങളും ചെയ്യുന്നതുപോലെ ഇസ്രായേലിന് ഒരു മൂല്യമുണ്ടെന്നും, ഞങ്ങൾ എന്താണ് ചെയ്യാൻ പോകുന്നതെന്ന് അവർ കാണുമെന്നും ബൈഡന്‍ പറഞ്ഞു.
ഒക്ടോബർ 7-ന് 1,400 ഇസ്രായേലികളെ കൊലപ്പെടുത്തിയ ഹമാസ് പ്രസ്ഥാനത്തെ ഉന്മൂലനം ചെയ്യുമെന്ന് പ്രതിജ്ഞയെടുത്ത സഖ്യകക്ഷിയായ ഇസ്രായേലിന് യുഎസ് പിന്തുണ പ്രഖ്യാപിച്ചപ്പോഴും, ബൈഡന്റെ മിഡിൽ ഈസ്റ്റിലേക്കുള്ള യാത്ര ഈ മേഖലയെ ശാന്തമാക്കുമെന്ന് എല്ലാവരും കരുതി.
എന്നാൽ, ആശുപത്രി സ്ഫോടനത്തിന് ശേഷം, ജോർദാൻ രാജാവ് ബൈഡന്റെ യാത്രയുടെ രണ്ടാം പകുതി – ജോർദാൻ, ഈജിപ്ത്, പലസ്തീൻ അതോറിറ്റി നേതാക്കളുമായി അമ്മാനിൽ ചേരാനിരുന്ന ഉച്ചകോടി – റദ്ദാക്കി.
ബൈഡന്റെ “അസന്ദിഗ്ധമായ പിന്തുണ”ക്ക് നെതന്യാഹു നന്ദി പറഞ്ഞു. “ഇസ്രായേൽ രാഷ്ട്രത്തെ സംരക്ഷിച്ചതിന് ദൈവം നിങ്ങളെ അനുഗ്രഹിക്കട്ടെ” എന്ന് അദ്ദേഹം ബൈഡനോട് പറഞ്ഞതായി പ്രസിഡന്റ് ഐസക് ഹെർസോഗിന്റെ ഓഫീസ് അറിയിച്ചു.
അതേസമയം, ആശുപത്രിയിൽ നിന്നുള്ള നാശത്തിന്റെ ദൃശ്യങ്ങൾ, കഴിഞ്ഞ 12 ദിവസങ്ങളിലെ സംഭവങ്ങളുമായി താരതമ്യം ചെയ്യുമ്പോള്‍ അതിഭയാനകമാണ്. ദയനീയമായ കാഴ്ചയാണ് ലോകം കണ്ടത്. ആദ്യം വീടുകളിൽ അറുക്കപ്പെട്ട ഇസ്രായേലികളുടെ മൃതദേഹങ്ങളും പിന്നീട് ഇസ്രായേലിന്റെ പ്രതികാര ആക്രമണത്തിൽ അവശിഷ്ടങ്ങൾക്കടിയിൽ കുഴിച്ചുമൂടിയ ഫലസ്തീൻ കുടുംബങ്ങളുടെയും.
രക്ഷപ്പെട്ടവർക്കായി രക്ഷാപ്രവർത്തകർ രക്തം പുരണ്ട അവശിഷ്ടങ്ങൾ അരിച്ചുപെറുക്കി. ഒരു ഗാസ സിവിൽ ഡിഫൻസ് മേധാവി മരണസംഖ്യ 300 ആണെന്നാണ് നിഗമനം ചെയ്തത്. എന്നാല്‍, ആരോഗ്യ മന്ത്രാലയ വൃത്തങ്ങൾ ഇത് 500 ആയി കണക്കാക്കുന്നു. അതേസമയം, ഇസ്രായേലാകട്ടേ ആ കണക്കുകൾ നിഷേധിച്ചു. രക്ഷാപ്രവർത്തകർ ഇപ്പോഴും മൃതദേഹങ്ങൾ കണ്ടെടുക്കുകയാണെന്ന് ഫലസ്തീൻ മന്ത്രാലയ വക്താവ് അഷ്‌റഫ് അൽ ഖുദ്ര പറഞ്ഞു.
“ഞങ്ങളെ സഹായിക്കൂ, സഹായിക്കൂ, ആശുപത്രിക്കുള്ളിൽ കൊല്ലപ്പെടുകയും മുറിവേറ്റവരുമുണ്ട്” എന്ന് നിലവിളിച്ചുകൊണ്ട് ആളുകൾ ശസ്ത്രക്രിയാ വിഭാഗത്തിലേക്ക് ഓടിക്കയറി എന്ന് ആശുപത്രിയിലെ ഓർത്തോപീഡിക് സർജറി വിഭാഗം മേധാവി ഡോ. ഫാദൽ നയീം പറഞ്ഞു.
“ആശുപത്രി നിറയെ മരിച്ചവരും മുറിവേറ്റവരും മരിച്ചവരുടെ ഛിന്നഭിന്നമായ ശരീരങ്ങളും ആയിരുന്നു,” അദ്ദേഹം വാര്‍ത്താ മാധ്യമങ്ങളോട് പറഞ്ഞു. “രക്ഷിക്കാൻ കഴിയുന്നവരെ രക്ഷിക്കാൻ ഞങ്ങൾ ശ്രമിച്ചു, പക്ഷേ ആശുപത്രി ടീമിന് രക്ഷിക്കാൻ കഴിയാത്തത്ര വലിയ സംഖ്യയാണ് … ഞങ്ങൾ അവരെ ജീവനോടെ കണ്ടു, പക്ഷേ ഞങ്ങൾക്ക് അവരെ സഹായിക്കാനായില്ല, അവർ രക്തസാക്ഷികളായി,” അദ്ദേഹം പറഞ്ഞു.
ആശുപത്രി സ്ഫോടനം നടന്ന സ്ഥലത്തിന്റെ ഡ്രോൺ ദൃശ്യങ്ങൾ ഇസ്രായേൽ പിന്നീട് പുറത്തുവിട്ടു, മിസൈലിൽ നിന്നോ ബോംബിൽ നിന്നോ ആഘാതമുള്ള ഗർത്തം ഇല്ലാതിരുന്നതിനാൽ തങ്ങൾ ഉത്തരവാദിയല്ലെന്നാണ് അവര്‍ പറയുന്നത്.
റോക്കറ്റുകൾ മിസ് ഫയറിംഗ് നടന്നതിനെ കുറിച്ച് ഭീകരർ തമ്മിലുള്ള ആശയവിനിമയത്തിന്റെ ഓഡിയോ റെക്കോർഡിംഗാണ് ഇസ്രായേൽ സൈന്യം പുറത്തുവിട്ടത്.
സ്ഫോടനം ഇസ്രായേലി ആക്രമണമാണെന്ന് ഫലസ്തീനുകാർ അടിയുറച്ചു വിശ്വസിക്കുന്നു. ഇസ്രായേൽ ബോംബാക്രമണത്തിൽ ഇതിനകം ഭവനരഹിതരായ ആയിരക്കണക്കിന് ഗസ്സക്കാർ അഭയകേന്ദ്രമായി ഉപയോഗിച്ചിരുന്ന ആശുപത്രി വിട്ടുപോകാൻ സിവിലിയന്മാർക്ക് ഒരു മുന്നറിയിപ്പും നൽകിയില്ലെന്നും അവര്‍ പറഞ്ഞു.
ഇസ്രായേൽ ബോംബാക്രമണത്തിൽ നിന്ന് രക്ഷപ്പെട്ട സ്ത്രീകൾക്കും കുട്ടികൾക്കും ഈ സ്ഥലം സുരക്ഷിത താവളമൊരുക്കിയിരുന്നു എന്ന് ആശുപത്രിയിലെ മറ്റൊരു ഡോക്ടർ ഇബ്രാഹിം അൽ-നഖ പറഞ്ഞു. “ഷെല്ലിനെ എന്താണ് വിളിക്കുന്നതെന്ന് ഞങ്ങൾക്ക് അറിയില്ല, പക്ഷേ അത് കുട്ടികളെ ലക്ഷ്യമാക്കി അവരുടെ ശരീരം കഷണങ്ങളാക്കിയപ്പോൾ
ആ ഭീകര ദൃശ്യം ഞങ്ങള്‍ക്ക് കാണേണ്ടി വന്നു,” അദ്ദേഹം പറഞ്ഞു.
മരണസംഖ്യ കുതിച്ചുയരുന്നു
ഗാസ മുനമ്പിൽ നടന്നുകൊണ്ടിരിക്കുന്ന ഇസ്രായേൽ ആക്രമണങ്ങളിൽ മരിച്ചവരുടെ എണ്ണം 3,300 കവിഞ്ഞു, ഒക്ടോബർ 7 മുതൽ 13,000 പേർക്ക് പരിക്കേറ്റതായി പലസ്തീൻ ആരോഗ്യമന്ത്രി ബുധനാഴ്ച പറഞ്ഞു.
“ഇസ്രായേലിന്റെ തുടർച്ചയായ ബോംബാക്രമണത്തിന്റെ ഫലമായി ഗാസ മുനമ്പിലെ രക്തസാക്ഷികളുടെ എണ്ണം 3,300 കവിഞ്ഞു. അതേസമയം, പരിക്കേറ്റവരുടെ എണ്ണം 13,000 ലധികമാണ്,” ആരോഗ്യമന്ത്രി മൈ അൽ-കൈല റാമല്ലയിൽ ഒരു പത്രസമ്മേളനത്തിൽ പറഞ്ഞു.
ഗാസയിൽ മരുന്നുകളുടെ കടുത്ത ക്ഷാമവും ആശുപത്രികളിലേക്കുള്ള പ്രവേശനത്തിലെ പ്രശ്നങ്ങളും അദ്ദേഹം ഊന്നിപ്പറഞ്ഞു. വെള്ളക്കെട്ടും മലിനജല സംവിധാനത്തിന്റെ അപചയവും പകർച്ചവ്യാധികൾ പടരാനുള്ള സാധ്യത വർധിപ്പിച്ചിട്ടുണ്ട്.
അൽ-അഹ്‌ലി ബാപ്റ്റിസ്റ്റ് ഹോസ്പിറ്റലിലെ ഇസ്രായേൽ വ്യോമാക്രമണത്തെ അവർ ശക്തമായി അപലപിക്കുകയും ഇസ്രായേൽ ബോംബാക്രമണത്തിൽ നൂറുകണക്കിന് ആളുകൾക്ക് ജീവൻ നഷ്ടപ്പെട്ടതായും പ്രസ്താവിച്ചു.
“അൽ-അഹ്‌ലി ബാപ്റ്റിസ്റ്റ് ഹോസ്പിറ്റൽ കൂട്ടക്കൊലയിൽ ഇസ്രായേലിന് പങ്കുണ്ടെന്ന് ഞങ്ങൾ ഉറപ്പിച്ചു പറയുന്നു. ആശുപത്രി ബോംബാക്രമണത്തിൽ നിന്ന് അവര്‍ക്ക് സ്വയം മോചിപ്പിക്കാൻ കഴിയില്ല. ഞങ്ങൾ ഉത്തരവാദിത്തം ആവശ്യപ്പെടുന്നു,” അൽ-കൈല പറഞ്ഞു.
ചൊവ്വാഴ്ച വൈകുന്നേരം, അൽ-അഹ്‌ലി ബാപ്റ്റിസ്റ്റ് ഹോസ്പിറ്റലിനെ ലക്ഷ്യമിട്ട് ഇസ്രായേൽ നടത്തിയ വ്യോമാക്രമണത്തിൽ 500 ലധികം ഫലസ്തീനികൾ കൊല്ലപ്പെട്ടതായി ഗാസയിലെ ആരോഗ്യ മന്ത്രാലയ വക്താവ് അഷ്‌റഫ് അൽ-ഖേദ്ര റിപ്പോർട്ട് ചെയ്തു.
ബൈഡൻ ഇസ്രായേലി ആക്രമണത്തെ ബൈഡന്‍ പിന്തുണച്ചതിന് ശേഷം, മറ്റ് പാശ്ചാത്യ നേതാക്കളും ജാഗ്രത പാലിക്കണമെന്ന് ആവശ്യപ്പെട്ടു.
മിഡിൽ ഈസ്റ്റിലെ തെരുവുകളിൽ സ്ഫോടനം പുതിയ സംഘര്‍ഷവും ക്രോധവും ക്രോധം അഴിച്ചുവിട്ടു. വികാരങ്ങളെ ശാന്തമാക്കാനും സംഘർഷം അതിർത്തികൾക്കപ്പുറത്തേക്ക് വ്യാപിക്കുന്നത് തടയാനും ബൈഡന്റെ ശ്രമം വിഫലമായി.
ബൈഡൻ കൂടിക്കാഴ്ച റദ്ദാക്കിയ അറബ് നേതാക്കളിൽ ഒരാളായ പലസ്തീൻ അതോറിറ്റി പ്രസിഡന്റ് മഹ്മൂദ് അബ്ബാസിന്റെ സീറ്റായ വെസ്റ്റ് ബാങ്ക് നഗരമായ റമല്ലയിൽ സർക്കാർ വിരുദ്ധ പ്രതിഷേധക്കാരെ പിരിച്ചുവിടാൻ പലസ്തീൻ സുരക്ഷാ സേന കണ്ണീർ വാതകവും സ്റ്റൺ ഗ്രനേഡും പ്രയോഗിച്ചു.
ഇറാൻ പിന്തുണയുള്ള ഹിസ്ബുള്ള പ്രസ്ഥാനവും ഇസ്രായേലും തമ്മിലുള്ള അതിർത്തി സംഘർഷം 2006-ലെ അവസാന യുദ്ധത്തിന് ശേഷമുള്ള ഏറ്റവും മാരകമായ നിലയിലേക്ക് എത്താന്‍ സാധ്യതയുണ്ടെന്ന നിഗമനത്തില്‍, ലെബനനിലേക്ക് പോകരുതെന്ന് യുഎസ് സ്റ്റേറ്റ് ഡിപ്പാർട്ട്മെന്റ് അമേരിക്കന്‍ പൗരന്മാര്‍ക്ക് പുതിയ മുന്നറിയിപ്പ് നൽകിയിട്ടുണ്ട്.
ഒക്ടോബർ ഏഴിന് നടന്ന ആക്രമണത്തെ തുടർന്ന് ബൈഡൻ ഇസ്രായേലിനെ ശക്തമായി പിന്തുണച്ചിരുന്നു. എന്നാൽ, ഭക്ഷണമോ ഇന്ധനമോ വെള്ളമോ വൈദ്യസഹായമോ ലഭിക്കാതെ 2.3 ദശലക്ഷം ഫലസ്തീനികൾ സമ്പൂർണ ഉപരോധത്തിൽ കഴിയുന്ന ഗാസ മുനമ്പിലെ സാധാരണക്കാരുടെ ദുരിതം ലഘൂകരിക്കാനുള്ള വ്യക്തമായ ഇസ്രായേലി പ്രതിബദ്ധത നേടിയെടുക്കാൻ അദ്ദേഹത്തിന് കഴിഞ്ഞില്ല.
ഈജിപ്ഷ്യൻ അതിർത്തിക്കടുത്തുള്ള ഗാസ സ്ട്രിപ്പ് തീരത്തിന്റെ തെക്ക് ഭാഗത്തുള്ള അൽ-മവാസിയിലെ ഒരു “മാനുഷിക മേഖലയിൽ” മാനുഷിക സഹായം ലഭ്യമാക്കുമെന്ന് ഇസ്രായേൽ സൈന്യം ബുധനാഴ്ച പ്രഖ്യാപിച്ചിട്ടുണ്ട്. എന്നാല്‍, സഹായം എങ്ങനെ എത്തുമെന്ന് വ്യക്തമാക്കിയിട്ടില്ല.
