ലാഹോർ: സിഖ് തീർഥാടകർക്ക് വിസ ഓൺ അറൈവൽ, ടൂറുകൾ ഉൾപ്പെടെയുള്ള പ്രത്യേക പാക്കേജ് പഞ്ചാബ് കെയര്‍‌ടേക്കര്‍ മുഖ്യമന്ത്രി മൊഹ്‌സിൻ നഖ്‌വി അവതരിപ്പിച്ചു.
ലാഹോർ, നങ്കാന സാഹിബ്, ഹസൻ അബ്ദാൽ, കർതാർപൂർ എന്നിവിടങ്ങളിലെ സിഖ് മതകേന്ദ്രങ്ങൾ സംരക്ഷിക്കുന്നതിന് അമേരിക്കയിൽ നിന്നും മറ്റ് രാജ്യങ്ങളിൽ നിന്നുമുള്ള സിഖ് തീർഥാടകരുടെ ഒരു പ്രതിനിധി സംഘം നഖ്‌വിക്ക് നന്ദി അറിയിച്ചു. അവർ അദ്ദേഹത്തിന് പരമ്പരാഗത ചാദറും സമ്മാനിച്ചു. തീർത്ഥാടകർ പഞ്ചാബിൽ തങ്ങൾക്ക് ലഭിച്ച ഊഷ്മള സ്വീകരണത്തിന് അഗാധമായ അഭിനന്ദനം അറിയിച്ചു.
പാക്കിസ്താനിലെ സിഖ് തീർഥാടകർക്ക് വിസ ഓൺ അറൈവൽ നൽകാനുള്ള ശ്രമങ്ങളെ സൂചിപ്പിച്ച് മൊഹ്‌സിൻ നഖ്‌വി ഒരു സുപ്രധാന പ്രഖ്യാപനം നടത്തി. ഫെഡറൽ ഗവൺമെന്റുമായി ഇത് സംബന്ധിച്ച് നടന്നുകൊണ്ടിരിക്കുന്ന ചർച്ചകളെക്കുറിച്ചും അദ്ദേഹം സംസാരിച്ചു. സിഖ് കമ്മ്യൂണിറ്റിക്കായി നങ്കാന സാഹിബിൽ ഒരു കമ്മ്യൂണിറ്റി സെന്റർ സ്ഥാപിക്കാനും പഞ്ചാബിലെ സിഖ് തീർഥാടകർക്കായി ഒരു പ്രത്യേക ടൂർ പാക്കേജ് അവതരിപ്പിക്കാനുമുള്ള പദ്ധതികളും അദ്ദേഹം പരാമർശിച്ചു, അത് ഓൺലൈൻ ബുക്കിംഗില്‍ ലഭ്യമാണ്.
സിഖ് പ്രതിനിധി സംഘത്തിൽ യുവാക്കളെ ഉൾപ്പെടുത്തിയതിൽ നഖ്‌വി സംതൃപ്തി പ്രകടിപ്പിച്ചു. പാക്കിസ്താനിൽ അവർക്ക് ആതിഥ്യമര്യാദ നൽകുമെന്ന് ഉറപ്പ് നൽകി. കൂടാതെ, ബാബ ഗുരുനാനാക്കിന്റെ ജന്മസ്ഥലമായ നങ്കാന സാഹിബിൽ നിന്നുള്ള വെള്ളം പാക്ക് ചെയ്ത് സിഖ് തീർത്ഥാടകർക്ക് നൽകുമെന്നും അദ്ദേഹം പറഞ്ഞു.
ചീഫ് സെക്രട്ടറി സാഹിദ് അക്തർ സമാൻ സിഖ് തീർഥാടക സംഘത്തെ സ്വാഗതം ചെയ്യുകയും പഞ്ചാബിലെ സിഖ് സഹോദരങ്ങൾക്കായി എക്‌സിക്യൂട്ടീവ് ടൂറുകൾ സംഘടിപ്പിക്കുകയും ചെയ്തു. ചടങ്ങിൽ വിവിധ പ്രവിശ്യാ മന്ത്രിമാരും ഉദ്യോഗസ്ഥരും പങ്കെടുത്തു.
