ബംഗളൂരു: കർണാടക മുഖ്യമന്ത്രി സിദ്ധരാമയ്യ ഡിസംബർ 26 ന് ബിരുദധാരികൾക്കും ഡിപ്ലോമ ഹോൾഡർമാർക്കും തൊഴിലില്ലായ്മ സഹായം വാഗ്ദാനം ചെയ്യുന്ന അഞ്ചാമത്തെയും അവസാനത്തെയും തിരഞ്ഞെടുപ്പ് ഗ്യാരന്റി ‘യുവ നിധി’ രജിസ്ട്രേഷൻ ബെംഗളൂരുവിൽ ആരംഭിച്ചു.
സ്വാമി വിവേകാനന്ദന്റെ ജന്മവാർഷികത്തോടനുബന്ധിച്ച് ദേശീയ യുവജന ദിനം ആചരിക്കുന്ന ജനുവരി 12 ന് സർക്കാർ അലവൻസ് വിതരണം ആരംഭിക്കും.
2022-23 അധ്യയന വർഷത്തിൽ വിജയിച്ച ബിരുദധാരികൾക്ക് 3,000 രൂപയും ഡിപ്ലോമ ഹോൾഡർമാർക്ക് 1,500 രൂപയും ധനസഹായം പദ്ധതി വാഗ്ദാനം ചെയ്യുന്നു.
ബിരുദം/ഡിപ്ലോമ പാസായ തീയതി മുതൽ 180 ദിവസം കഴിഞ്ഞിട്ടും ജോലി ലഭിക്കാത്തവർക്ക് പണം നൽകുമെന്നും ഉദ്യോഗാർത്ഥികൾ കുറഞ്ഞത് ആറ് വർഷമെങ്കിലും കർണാടകയില്‍ താമസിക്കുന്നതിന്റെ തെളിവുകള്‍ നല്‍കേണ്ടതുണ്ടെന്നും അധികൃതർ അറിയിച്ചു.
പ്രധാനമന്ത്രി നരേന്ദ്ര മോദി ഒരു സാമ്പത്തിക വിദഗ്ധനാണോയെന്ന് ഉദ്ഘാടന വേളയിൽ മുഖ്യമന്ത്രി സിദ്ധരാമയ്യ ചോദിച്ചു. കോൺഗ്രസ് ഇപ്പോൾ അഞ്ച് ഉറപ്പുകളും നടപ്പാക്കിയെന്നും മോദിയുടെ പ്രസ്താവന തെറ്റാണെന്നും അദ്ദേഹം പറഞ്ഞു.
മിസ്റ്റർ മോദി ഒരു സാമ്പത്തിക വിദഗ്ധനാണോ? സംസ്ഥാനം പാപ്പരാകുമെന്ന് അദ്ദേഹം പറഞ്ഞിരുന്നു. അഞ്ച് ഉറപ്പുകളും നടപ്പിലാക്കി, സംസ്ഥാനം സാമ്പത്തികമായി കെട്ടുറപ്പുള്ളതാണെന്നും മുഖ്യമന്ത്രി പറഞ്ഞു.
2022-2023 അധ്യയന വർഷത്തിൽ പാസായ ഏകദേശം 5.3 ലക്ഷം യുവാക്കളെ അർഹരായ ഗുണഭോക്താക്കളായി കണ്ടെത്തിയിരുന്നു. എന്നാല്‍, ജോലിയുള്ളവർക്കും ഉന്നത വിദ്യാഭ്യാസം നേടുന്നവർക്കും ഈ അലവന്‍സിന് അർഹതയില്ല. രണ്ടു വർഷത്തേക്കാണ് ധനസഹായം. ശേഷിക്കുന്ന സാമ്പത്തിക വർഷത്തിൽ മൊത്തം ₹ 250 കോടിയാണ് കണക്കാക്കുന്നത്, പദ്ധതിക്ക് അടുത്ത വർഷം ₹ 1,250 കോടിയും അതിന് ശേഷമുള്ള വർഷം ₹ 2,500 കോടിയും ചെലവ് പ്രതീക്ഷിക്കുന്നു.
യുവ നിധിയോടൊപ്പം യുവാക്കൾക്ക് സൗജന്യ പരിശീലനവും നൽകുമെന്ന് സിദ്ധരാമയ്യ പറഞ്ഞു. “പ്രതിവർഷം രണ്ട് കോടി തൊഴിലവസരങ്ങൾ സൃഷ്ടിക്കുമെന്ന് മോദി വാഗ്ദാനം ചെയ്തിരുന്നു, അപ്പോഴേക്കും നിങ്ങൾ രാജ്യത്തുടനീളം 20 കോടി തൊഴിലവസരങ്ങൾ സൃഷ്ടിച്ചിരിക്കണം. നിങ്ങൾ വാഗ്ദാനം ചെയ്ത തൊഴിലവസരങ്ങൾ സൃഷ്ടിച്ചോ? നിങ്ങൾ നിങ്ങളുടെ വാഗ്ദാനം പാലിച്ചിട്ടില്ല, ”അദ്ദേഹം കൂട്ടിച്ചേർത്തു.
ഫലം പ്രഖ്യാപിക്കുന്ന തീയതി മുതൽ രണ്ടു വർഷത്തേക്കോ അല്ലെങ്കിൽ അവന്‍/അവൾ ജോലി ചെയ്യുന്നത്/സ്വയംതൊഴിൽ തുടങ്ങുന്നത് വരെയോ തൊഴിലില്ലായ്മ അലവൻസ് നൽകും.
തുക ഗുണഭോക്താക്കളുടെ ബാങ്ക് അക്കൗണ്ടിലേക്ക് നേരിട്ട് കൈമാറും
