സാന്‍ഫ്രാന്‍സിസ്കോ: സാൻഫ്രാൻസിസ്കോയിൽ ജനക്കൂട്ടം പടക്കം ഉപയോഗിച്ച് Waymo സെൽഫ് ഡ്രൈവിംഗ് കാർ നശിപ്പിക്കുകയും കത്തിക്കുകയും ചെയ്തു. ഇത് യുഎസിൽ ഇതുവരെ ഡ്രൈവറില്ലാ വാഹനങ്ങൾക്ക് നേരെ നടന്ന ഏറ്റവും വിനാശകരമായ ആക്രമണമാണെന്ന് ആൽഫബെറ്റിൻ്റെ ഉടമസ്ഥതയിലുള്ള കമ്പനിയും അധികാരികളും പറഞ്ഞു.
ശനിയാഴ്ച രാത്രി നഗരത്തിലെ ചൈന ടൗണില്‍ തെരുവിലൂടെ നീങ്ങിയിരുന്ന ഒരു വെള്ള സ്‌പോർട് യൂട്ടിലിറ്റി വാഹനത്തെ ഒരു ജനക്കൂട്ടം വളഞ്ഞതായി കമ്പനി വക്താവ് പറഞ്ഞു.
ചൈനയുടെ ചാന്ദ്ര പുതുവത്സരം ആളുകൾ പടക്കം പൊട്ടിച്ച് ആഘോഷിക്കുകയായിരുന്നു എന്ന് സംഭവത്തിൻ്റെ വീഡിയോകൾ പോസ്റ്റ് ചെയ്ത സാക്ഷിയായ മൈക്കൽ വന്ദി മാധ്യമങ്ങളോട് പറഞ്ഞു. ഒരാൾ വെയ്‌മോ വാഹനത്തിൻ്റെ ഹുഡിലേക്ക് ചാടി അതിൻ്റെ മുൻവശത്തെ ഗ്ലാസ് തകർത്തു. ആൾക്കൂട്ടത്തിൽ ചിലർ കൈയടിച്ചപ്പോൾ 30 സെക്കൻഡിനുശേഷം മറ്റൊരാളും ഹുഡിലേക്ക് ചാടുകയും അതുകണ്ട് മറ്റുള്ളവര്‍ ചുറ്റും കൂടി ചില്ലുകൾ തകർക്കുകയും വാഹനത്തിന് തീ കൊടുക്കുന്നതുമാണ് പിന്നീട് കാണാന്‍ കഴിഞ്ഞതെന്ന് മൈക്കല്‍ പറഞ്ഞു.
ആരോ പടക്കങ്ങൾ വാഹനത്തിനകത്തേക്ക് എറിഞ്ഞെന്നും അത് വാഹനത്തിന് തീ പിടിക്കാനിടയായെന്നും വെയ്‌മോ പറഞ്ഞു. അഗ്നിശമനസേന കാറിൻ്റെ കത്തിനശിച്ച അവശിഷ്ടങ്ങളുടെ ചിത്രങ്ങൾ സോഷ്യൽ മീഡിയയിൽ പോസ്റ്റ് ചെയ്യുകയും പടക്കമാണ് തീ പടരാൻ കാരണമായതെന്നും പറഞ്ഞു.
“വാഹനത്തില്‍ യാത്രക്കാരാരും ഉണ്ടായിരുന്നില്ല. ആര്‍ക്കും പരിക്കുകളൊന്നും റിപ്പോർട്ട് ചെയ്തിട്ടില്ല. സാഹചര്യം കൈകാര്യം ചെയ്യാന്‍ ഞങ്ങൾ പ്രാദേശിക സുരക്ഷാ ഉദ്യോഗസ്ഥരുമായി ചേർന്ന് പ്രവർത്തിക്കുന്നു. ആക്രമണ കാരണം എന്താണെന്ന് വ്യക്തമായിട്ടില്ല,” കമ്പനി വക്താവ് പറഞ്ഞു.
തീപിടിത്തത്തിൻ്റെ കാരണം അന്വേഷിച്ചുവരികയാണെന്നും ആരെയെങ്കിലും അറസ്റ്റ് ചെയ്തിട്ടുണ്ടോ എന്ന് ഇപ്പോള്‍ പറയാനാകില്ലെന്നും സാൻ ഫ്രാൻസിസ്കോ പോലീസ് ഡിപ്പാർട്ട്മെൻ്റ് അറിയിച്ചു. ഇലക്ട്രിക് കാറായ ജാഗ്വാർ ഐ-പേസിൽ 29 ക്യാമറകളും മറ്റ് സെൻസറുകളും സജ്ജീകരിച്ചിട്ടുണ്ടെന്നും പോലീസ് പറഞ്ഞു.
സൂപ്പർ ബൗൾ NFL ചാമ്പ്യൻഷിപ്പിന് ഒരു ദിവസം മുമ്പാണ് ഈ സംഭവം നടന്നത്.
സെല്‍‌ഫ് ഡ്രൈവിംഗ് കാറുകള്‍ക്ക് നേരെയുള്ള ആക്രമണം ഇത് ആദ്യത്തെ സംഭവമല്ല. കഴിഞ്ഞ വർഷം ജനറൽ മോട്ടോഴ്‌സിൻ്റെ ഡ്രൈവറില്ലാ വാഹനം കാൽനടയാത്രക്കാരെ വലിച്ചിഴച്ച അപകടത്തെത്തുടർന്ന് ജനങ്ങളില്‍ വർദ്ധിച്ചുവരുന്ന ആക്രമണ പ്രവണതയെ ഈ സംഭവം ചൂണ്ടിക്കാണിക്കുന്നു.
മുമ്പ് സാൻ ഫ്രാൻസിസ്കോയിലും അരിസോണയിലെ ഫീനിക്സിലും ചില ഗ്രൂപ്പുകൾ സെല്‍‌ഫ് ഡ്രൈവിംഗ് വാഹനങ്ങളുടെ പ്രവർത്തനം തടസ്സപ്പെടുത്തുകയും, അവയുടെ പാത തടയുകയും, വാഹനങ്ങളിൽ പ്രവേശിക്കാൻ ശ്രമിക്കുകയും, ഹുഡുകളിൽ ചാടിക്കയറുകയും ചെയ്തിട്ടുണ്ട്. സെൻസറുകളെ തടസ്സപ്പെടുത്താൻ ആളുകൾ വാഹനങ്ങൾക്ക് മുകളിൽ ഓറഞ്ച് ട്രാഫിക് കോണുകൾ ഇടുന്നതും പെട്ടെന്ന് നിർത്താൻ നിർബന്ധിക്കുന്നതും കാണിക്കുന്ന വീഡിയോകള്‍ വൈറലായിരുന്നു.
കഴിഞ്ഞയാഴ്ച, സാൻഫ്രാൻസിസ്കോയിൽ ഡ്രൈവറില്ലാത്ത വെയ്‌മോ കാർ ഒരു സൈക്കിൾ യാത്രക്കാരനെ ഇടിച്ചതിനെത്തുടര്‍ന്ന് പരിക്കേറ്റ സംഭവം സംസ്ഥാനത്തെ മോട്ടോര്‍ വാഹന വകുപ്പ് പരിശോധിച്ചുവരികയാണ്.
ഫീനിക്‌സിൽ ഡ്രൈവറില്ലാ റൈഡ്-ഹെയ്‌ലിംഗ് സേവനം Waymo വാഗ്ദാനം ചെയ്യുന്നു. കൂടാതെ, ലോസ് ഏഞ്ചൽസിലേക്കും ടെക്‌സസിലെ ഓസ്റ്റിനിലേക്കും സേവനം വിപുലീകരിക്കാനുള്ള ശ്രമത്തിലുമാണ്.
2023 ഒക്‌ടോബർ 2-ന്, മറ്റൊരു വാഹനം ഒരു കാൽനടയാത്രക്കാരനെ ഡ്രൈവറില്ലാ വാഹനത്തിൻ്റെ പാതയിലേക്ക് ഇടിച്ചിട്ടതിനെത്തുടര്‍ന്ന് സാരമായ പരിക്കേല്‍ക്കുകയും ചെയ്തിരുന്നു. കാലിഫോർണിയ പിന്നീട് കമ്പനിയുടെ ഡ്രൈവറില്ലാ ടെസ്റ്റിംഗ് ലൈസൻസ് സസ്പെൻഡ് ചെയ്തു. കൂടാതെ, എല്ലാ യുഎസ് സെൽഫ് ഡ്രൈവിംഗ് വാഹനങ്ങളും ടെസ്റ്റിംഗിൽ നിന്ന് പിൻവലിച്ചു.
പൂർണ്ണമായും ഡ്രൈവറില്ലാ പരീക്ഷണ വാഹനങ്ങൾ, കൂടുതലും ക്രൂയിസ്, വെയ്‌മോ ഫ്ലീറ്റുകളിൽ നിന്ന്, കഴിഞ്ഞ വർഷം കാലിഫോർണിയയിൽ ഏകദേശം 3.3 ദശലക്ഷം മൈൽ (5.3 ദശലക്ഷം കിലോമീറ്റർ) സഞ്ചരിച്ചതായി ഡാറ്റ കാണിക്കുന്നു.
