അഹമ്മദാബാദ്: 2002ലെ ഗോധ്ര കലാപത്തിനിടെ ബിൽക്കീസ് ബാനോയെ കൂട്ടബലാത്സംഗം ചെയ്യുകയും അവരുടെ ഏഴ് കുടുംബാംഗങ്ങളെ കൊലപ്പെടുത്തുകയും ചെയ്ത കേസിലെ പ്രതി തൻ്റെ കുടുംബത്തിലെ വിവാഹത്തിൽ പങ്കെടുക്കാൻ പരോൾ ആവശ്യപ്പെട്ട് ഗുജറാത്ത് ഹൈക്കോടതിയെ സമീപിച്ചു.
മരുമകളുടെ വിവാഹത്തിൽ പങ്കെടുക്കാൻ പരോളിൽ വിട്ടുകിട്ടണമെന്ന അപേക്ഷയുമായി രമേഷ്ഭായ് ചന്ദന വെള്ളിയാഴ്ചയാണ് ഹൈക്കോടതിയെ സമീപിച്ചത്.
ഗുജറാത്ത് സർക്കാർ അനുവദിച്ച ഇളവ് സുപ്രീം കോടതി റദ്ദാക്കിയതിനെ തുടർന്ന് ചന്ദനയെയും മറ്റ് 10 പേരെയും കഴിഞ്ഞ മാസം ജയിലിലേക്ക് തിരിച്ചയച്ചിരുന്നു.
നേരത്തെ, കേസിലെ മറ്റൊരു പ്രതിയായ പ്രദീപ് മോഡിയയുടെ ഹർജി ഹൈക്കോടതി അനുവദിച്ചതിനെത്തുടർന്ന് ഫെബ്രുവരി 7 മുതൽ 11 വരെ ഗോധ്ര ജില്ലാ ജയിലിൽ നിന്ന് പരോളിൽ പുറത്തിറങ്ങിയിരുന്നു.
മാർച്ച് അഞ്ചിന് തൻ്റെ മരുമകളുടെ വിവാഹത്തിൽ പങ്കെടുക്കാൻ തൻ്റെ കക്ഷി ആഗ്രഹിക്കുന്നുവെന്ന് ചന്ദനയുടെ അഭിഭാഷകൻ ഖുശ്ബു വ്യാസ് ജസ്റ്റിസ് ദിവ്യേഷ് ജോഷിയെ ധരിപ്പിച്ചു. തുടർന്ന് കോടതി രജിസ്ട്രിയോട് “അനുയോജ്യമായ സമയം നിശ്ചയിച്ച്” കോടതിയെ അറിയിക്കാന്‍ നിർദ്ദേശിച്ചു.
ഗുജറാത്ത് സർക്കാർ സുപ്രീം കോടതിയിൽ സമർപ്പിച്ച സത്യവാങ്മൂലമനുസരിച്ച്, 2008-ൽ തടവിലായതിന് ശേഷം 1,198 ദിവസത്തെ പരോളും 378 ദിവസത്തെ അവധിയും ചന്ദന അനുഭവിച്ചിട്ടുണ്ട്.
2022 ഓഗസ്റ്റിൽ, ജീവപര്യന്തം ശിക്ഷ അനുഭവിച്ചിരുന്ന 11 കുറ്റവാളികൾക്ക് ജയിൽവാസ സമയത്ത് അവരുടെ ‘നല്ല പെരുമാറ്റം’ ചൂണ്ടിക്കാട്ടി 1992 ലെ നയത്തിന് അനുസൃതമായി അവരുടെ ഇളവ് അപേക്ഷകൾ സംസ്ഥാന സർക്കാർ സ്വീകരിച്ചതിനെത്തുടർന്ന് ജയിലിൽ നിന്ന് അകാല മോചനം അനുവദിച്ചു. എന്നാല്‍, കഴിഞ്ഞ മാസം 11 പ്രതികളുടെയും ശിക്ഷാ ഇളവ് സുപ്രീം കോടതി റദ്ദാക്കി.
2002-ലെ കേസിൻ്റെ വിചാരണ മഹാരാഷ്ട്രയിൽ നടന്നതിനാൽ പ്രതികൾക്ക് അകാല മോചനം നൽകാൻ സംസ്ഥാന സർക്കാരിന് അധികാരമില്ലെന്ന് വിധിച്ച് ജനുവരി 8-ന് ഇളവ് ഉത്തരവ് സുപ്രീം കോടതി റദ്ദാക്കി.
14 വർഷം ജയിലിൽ കഴിഞ്ഞ ശേഷം 2022 ലെ സ്വാതന്ത്ര്യ ദിനത്തിൽ ഗോധ്ര ജില്ലാ ജയിലിൽ നിന്ന് മോചിതരായ പ്രതികളോട് രണ്ടാഴ്ചയ്ക്കുള്ളിൽ ജയിലിലേക്ക് മടങ്ങാൻ സുപ്രീം കോടതി ഉത്തരവിട്ടു. ജനുവരി 21നാണ് ഇവർ ഗോധ്ര ജയിൽ അധികൃതർക്ക് മുന്നിൽ കീഴടങ്ങിയത്.
