ഇസ്ലാമാബാദ്: തോഷഖാന വാഹന കേസിൽ പാക്കിസ്താന്‍ മുൻ പ്രധാനമന്ത്രിയും പിഎംഎൽ-എൻ മേധാവിയുമായ നവാസ് ഷെരീഫിന് നാഷണൽ അക്കൗണ്ടബിലിറ്റി ബ്യൂറോ (എൻഎബി) ക്ലീൻ ചിറ്റ് നൽകി.
പ്രസിഡൻ്റ് ആസിഫ് അലി സർദാരി, പിഎംഎൽ-എൻ മേധാവി നവാസ് ഷെരീഫ്, സെനറ്റ് ചെയർമാൻ യൂസഫ് റാസ ഗില്ലാനി എന്നിവർക്കെതിരായ തോഷഖാന വാഹന കേസിലെ ഏറ്റവും പുതിയ സംഭവവികാസത്തിൽ, ഷരീഫിനെ കുറ്റവിമുക്തനാക്കണമെന്ന് എൻഎബി ബുധനാഴ്ച അക്കൗണ്ടബിലിറ്റി കോടതിയിൽ അപേക്ഷിച്ചു. നവാസ് ഷെരീഫിൻ്റെ അന്വേഷണവുമായി ബന്ധപ്പെട്ട വിശദമായ റിപ്പോർട്ട് എൻഎബി കോടതിയിൽ സമർപ്പിച്ചു.
1997ൽ നവാസ് ഷെരീഫിന് പ്രധാനമന്ത്രിയായിരിക്കെ സൗദി സർക്കാർ വാഹനം സമ്മാനമായി നൽകിയെന്നാണ് റിപ്പോർട്ട്.
നവാസ് ഷെരീഫ് വാഹനം തോഷഖാനയ്ക്ക് നല്‍കുകയും പിന്നീട് അത് ഫെഡറൽ ട്രാൻസ്പോർട്ട് പൂളിൻ്റെ ഭാഗമായി മാറുകയും ചെയ്തു.
2008ൽ പ്രധാനമന്ത്രിയായിരിക്കെയാണ് യൂസഫ് റാസ ഗില്ലാനി നവാസ് ഷെരീഫിന് വാഹനം വാങ്ങാൻ വാഗ്ദാനം ചെയ്തതെന്നും റിപ്പോർട്ടിൽ പറയുന്നു. തോഷഖാനയിൽ നിന്നല്ല, ഫെഡറൽ ട്രാൻസ്പോർട്ട് പൂളിൽ നിന്നാണ് നവാസ് ഷെരീഫ് വാഹനം വാങ്ങിയതെന്നും റിപ്പോർട്ടിൽ പറയുന്നു.
വ്യാജ ബാങ്ക് അക്കൗണ്ടിൽ നിന്ന് അദ്ദേഹം പണം നൽകിയിട്ടില്ലെന്നും റിപ്പോർട്ടിൽ പറയുന്നു.
വാഹനം വാങ്ങുമ്പോൾ തോഷഖാനയുടെ ഭാഗമായിരുന്നില്ല, അതിനാൽ നവാസ് ഷെരീഫിനെ കേസില്‍ നിന്ന് ഒഴിവാക്കാമെന്ന് എൻഎബി പറഞ്ഞു.
