വാഷിംഗ്ടണ്‍: അമേരിക്കൻ പ്രസിഡൻ്റ് തെരഞ്ഞെടുപ്പിൽ നിന്ന് പ്രസിഡൻ്റ് ജോ ബൈഡൻ പിന്മാറിയതിന് പിന്നാലെ ഡെമോക്രാറ്റിക് പാർട്ടിയുടെ സ്ഥാനാർത്ഥിയായി കമലാ ഹാരിസിനെ തിരഞ്ഞെടുത്തതോടെ തിരഞ്ഞെടുപ്പ് പ്രചാരണം ഊർജിതമായിരിക്കുകയാണ്. അതിനിടെ, കമലാ ഹാരിസിന്റെ ഭര്‍ത്താവ് ഡഗ് എംഹോഫ് ഞെട്ടിപ്പിക്കുന്ന വിവരങ്ങളാണ് പുറത്തുവിട്ടിരിക്കുന്നത്. താൻ തന്റെ മുന്‍ ഭാര്യയെ വഞ്ചിച്ചതായി അദ്ദേഹം ശനിയാഴ്ച സമ്മതിച്ചു.
മക്കളുടെ അദ്ധ്യാപികയുമായി തനിക്ക് അവിഹിത ബന്ധമുണ്ടായിരുന്നു എന്നും അവര്‍ ഗര്‍ഭിണിയായി എന്നുമാണ് റിപ്പോർട്ട്. നെയ്‌ലർ എന്ന കൗമാരക്കാരിയായ പെൺകുട്ടിയുമായി ഡഗ് എംഹോഫിന് അവിഹിത ബന്ധമുണ്ടായിരുന്നു എന്ന് സി എന്‍ എന്‍ അടക്കം വിവിധ മാധ്യമങ്ങള്‍ റിപ്പോര്‍ട്ട് ചെയ്തു. 15 വർഷം മുമ്പാണ് ഈ സംഭവം. അക്കാലത്ത് അദ്ദേഹത്തിൻ്റെ ഭാര്യ കെർസ്റ്റിൻ ആയിരുന്നു. നെയ്‌ലർ ഗർഭിണിയായി. എന്നാല്‍, ഗര്‍ഭം അലസിപ്പിച്ചു എന്ന് റിപ്പോര്‍ട്ടില്‍ പറയുന്നു.
നെയ്‌ലറുമായി തനിക്ക് ബന്ധമുണ്ടായിരുന്നു എന്ന് എംഹോഫ് പ്രസ്താവനയിൽ പറഞ്ഞു. “എൻ്റെ ആദ്യ വിവാഹ സമയത്ത് ഞാൻ കാരണം കെർസ്റ്റിനും എനിക്കും ചില ബുദ്ധിമുട്ടുള്ള സമയങ്ങളിലൂടെ കടന്നുപോകേണ്ടിവന്നു. ഞാൻ ഉത്തരവാദിത്തം ഏറ്റെടുത്തു, തുടർന്നുള്ള വർഷങ്ങളിൽ ഞങ്ങൾ ഒരു കുടുംബമായി സമയം ചെലവഴിച്ചു,” CNN-നോട് സംസാരിച്ച അദ്ദേഹം പറഞ്ഞു.
“പല കാരണങ്ങളാൽ വർഷങ്ങൾക്ക് മുമ്പ് ഞങ്ങളുടെ വിവാഹം അവസാനിപ്പിക്കാൻ ഡഗും ഞാനും തീരുമാനിച്ചു” എന്ന് അദ്ദേഹത്തിൻ്റെ ആദ്യ ഭാര്യ കെർസ്റ്റിൻ ശനിയാഴ്ച ഒരു പ്രസ്താവനയിൽ പറഞ്ഞു. “അദ്ദേഹം ഞങ്ങളുടെ കുട്ടികൾക്ക് ഒരു നല്ല പിതാവാണ്. എന്നെ സംബന്ധിച്ചിടത്തോളം അദ്ദേഹം ഒരു നല്ല സുഹൃത്ത് മാത്രമാണ്. ഞങ്ങളുടെ കുടുംബത്തെക്കുറിച്ച് ഞങ്ങൾ അഭിമാനിക്കുന്നു. ഡഗും കമലയും ഞാനും ചേർന്നാണ് ഈ കുടുംബത്തെ സൃഷ്ടിച്ചത്,” സിഎൻഎൻ റിപ്പോർട്ട് ചെയ്തു.
പ്രസിഡൻ്റ് ജോ ബൈഡൻ്റെ അന്വേഷണ സമിതി ഈ ബന്ധത്തെക്കുറിച്ച് നാല് വർഷം മുമ്പേ അറിഞ്ഞിരുന്നതായും റിപ്പോര്‍ട്ടില്‍ പറയുന്നു.
