വരാനിരിക്കുന്ന പ്രസിഡൻ്റ് തിരഞ്ഞെടുപ്പിൽ മുൻ പ്രസിഡൻ്റ് ഡൊണാൾഡ് ട്രംപും വൈസ് പ്രസിഡൻ്റ് കമലാ ഹാരിസും തമ്മിലുള്ള മത്സരത്തില്‍ “കുറവ് തിന്മ”യെ തിരഞ്ഞെടുക്കാൻ ഫ്രാൻസിസ് മാർപാപ്പ അടുത്തിടെ യുഎസ് കത്തോലിക്കാ വോട്ടർമാരോട് ഉപദേശിച്ചിരുന്നു. തെക്കുകിഴക്കൻ ഏഷ്യയിലെയും ഓഷ്യാനിയയിലെയും 12 ദിവസത്തെ പര്യടനത്തിന് ശേഷം തൻ്റെ വിമാനത്തിൽ നടത്തിയ പത്രസമ്മേളനത്തിൽ, ഒരു സ്ഥാനാർത്ഥിയെയും അംഗീകരിക്കാതെ, തിരഞ്ഞെടുപ്പിനെ ചുറ്റിപ്പറ്റിയുള്ള ധാർമ്മിക പ്രതിസന്ധികളെ അഭിസംബോധന ചെയ്ത് സംസാരിക്കുകയായിരുന്നു മാർപ്പാപ്പ. വോട്ടർമാരോട് അവരുടെ മനസ്സാക്ഷിയെക്കുറിച്ച് ചിന്തിക്കാൻ അദ്ദേഹം അഭ്യർത്ഥിച്ചു, “നിങ്ങൾ കുറഞ്ഞ തിന്മ തിരഞ്ഞെടുക്കണം. ആരാണ് കുറഞ്ഞ തിന്മ; ആ സ്ത്രീയോ ആ മാന്യനോ? എനിക്കറിയില്ല. എല്ലാവരും ശ്രദ്ധാപൂർവ്വം ചിന്തിച്ച് സ്വയം തീരുമാനമെടുക്കണം,” അദ്ദേഹം ഉദ്ബോധിപ്പിച്ചു.
രണ്ട് സ്ഥാനാർത്ഥികളുടെയും നയങ്ങളോട് മാർപാപ്പ തൻ്റെ വിയോജിപ്പ് പ്രകടിപ്പിച്ചു. ഗർഭച്ഛിദ്രത്തെക്കുറിച്ചുള്ള കമലാ ഹാരിസിന്റെ നിലപാടിനെ മാര്‍പ്പാപ്പ വിമർശിച്ചു, പ്രത്യേകിച്ച് റോയ് വി. വേഡ് ക്രോഡീകരിക്കുന്നതിനുള്ള അവരുടെ പിന്തുണ. “ഗർഭച്ഛിദ്രം ഒരു കൊലപാതകമാണ്,” ഒരു അപവാദവുമില്ലാതെ ഇക്കാര്യത്തിൽ വ്യക്തത വരുത്തണമെന്ന് ഫ്രാൻസിസ് മാർപാപ്പ പറഞ്ഞു. “ഈ വിഷയങ്ങളിൽ, നമ്മൾ വ്യക്തമായി സംസാരിക്കണം.
അതേസമയം, ട്രംപിൻ്റെ നിർദ്ദിഷ്ട ഇമിഗ്രേഷൻ നയങ്ങളെ അദ്ദേഹം അപലപിച്ചു, പ്രത്യേകിച്ച് യുഎസ് ചരിത്രത്തിലെ ഏറ്റവും വലിയ കൂട്ട നാടുകടത്തൽ എന്ന് വിശേഷിപ്പിക്കപ്പെടുന്ന അദ്ദേഹത്തിൻ്റെ പദ്ധതിയെ. “കുടിയേറ്റക്കാരെ സ്വാഗതം ചെയ്യാതിരിക്കുന്നത് പാപമാണ്. അത് ഗുരുതരമായ കാര്യമാണ്,” മാർപാപ്പ പറഞ്ഞു.
ഗർഭച്ഛിദ്രവും കടുത്ത കുടിയേറ്റ നയങ്ങളും അടിസ്ഥാനപരമായി ജീവിത വിരുദ്ധമാണെന്ന് ഊന്നിപ്പറഞ്ഞുകൊണ്ട് കത്തോലിക്കാ വോട്ടർമാർ അഭിമുഖീകരിക്കുന്ന പ്രയാസകരമായ തിരഞ്ഞെടുപ്പുകളെ ഫ്രാൻസിസ് മാർപാപ്പ അംഗീകരിച്ചു. “കുടിയേറ്റക്കാരെ ആരെങ്കിലും തുരത്തിയാലും മറ്റൊരാൾ കുട്ടികളെ കൊന്നാലും, രണ്ട് പ്രവർത്തനങ്ങളും ജീവിതത്തിന് എതിരാണ്. അതുകൊണ്ട് വോട്ടര്‍മാര്‍ അവരവരുടെ മനോധര്‍മ്മമനുസരിച്ച് തീരുമാനമെടുക്കുക, രണ്ട് തിന്മകളില്‍ ‘ചെറിയ തിന്മയെ’ തിരഞ്ഞെടുക്കുക,” അദ്ദേഹം പറഞ്ഞു.
