ന്യൂയോര്‍ക്ക്: ഗാസയില്‍ ഇസ്രായേല്‍ നടത്തുന്ന നാശനഷ്ടങ്ങളെക്കുറിച്ച് അമേരിക്ക മുന്നറിയിപ്പ് നല്‍കിയിരിക്കുകയാണ്. അടുത്ത മാസത്തോടെ ഗാസയിലെ മാനുഷിക സ്ഥിതി മെച്ചപ്പെടുത്താൻ നടപടിയെടുക്കാൻ ഇസ്രായേലിനോട് അമേരിക്ക ആവശ്യപ്പെട്ടതായി യുഎസ് ഉദ്യോഗസ്ഥർ പറഞ്ഞു. അത് ചെയ്തില്ലെങ്കിൽ, അത് സംഭവിച്ചില്ലെങ്കിൽ, അമേരിക്ക നൽകുന്ന സൈനിക സഹായം നിര്‍ത്തലാക്കുമെന്നാണ് ബൈഡന്‍ ഭരണകൂടം പറഞ്ഞത്. ഹമാസ് ഇസ്രയേലുമായി യുദ്ധം തുടങ്ങിയതിന് ശേഷം ഒരു വർഷത്തിനിടെയുണ്ടായ ഏറ്റവും ശക്തമായ മുന്നറിയിപ്പാണിത്. എന്നാല്‍ ഇത് എത്രത്തോളം വിശ്വാസയോഗ്യമാണെന്നാണ് ഇപ്പോള്‍ ഉയര്‍ന്നു വരുന്ന ചോദ്യം.
ഫലസ്തീനിലെ രൂക്ഷമായ സാഹചര്യം നേരിടാൻ ശക്തമായ നടപടികൾ സ്വീകരിക്കണമെന്ന് ആവശ്യപ്പെട്ട് യുഎസ് സ്റ്റേറ്റ് സെക്രട്ടറി ആൻ്റണി ബ്ലാങ്കനും പ്രതിരോധ സെക്രട്ടറി ലോയ്ഡ് ഓസ്റ്റിനും ഞായറാഴ്ച ഇസ്രായേൽ ഉദ്യോഗസ്ഥർക്ക് കത്തെഴുതിയെന്നു പറയുന്നു. അങ്ങനെ ചെയ്യുന്നത് അമേരിക്കൻ നയത്തെ സ്വാധീനിക്കുമെന്നും കത്തിൽ പറഞ്ഞിട്ടുണ്ട്. 30 ദിവസത്തിനകം ഇസ്രായേൽ സ്വീകരിക്കേണ്ട പ്രത്യേക നടപടികൾ കത്തിൽ പറയുന്നുണ്ട്. പ്രതിദിനം 350 ട്രക്കുകളെങ്കിലും ഗാസയിലേക്ക് കടക്കാൻ അനുവദിക്കുക, സഹായ വിതരണം അനുവദിക്കുന്നതിനുള്ള പോരാട്ടം നിർത്തുക, നടപടി ആവശ്യമില്ലെങ്കിൽ പലസ്തീനിയൻ സിവിലിയന്മാർക്ക് നൽകിയ പലായന ഉത്തരവുകൾ പിൻവലിക്കുക എന്നിവ ഇതിൽ ഉൾപ്പെടുന്നു.
“ഈ നടപടികൾ നടപ്പിലാക്കുന്നതിലും പരിപാലിക്കുന്നതിലും പരാജയപ്പെടുന്നത് യുഎസ് നയത്തെയും അനുബന്ധ യുഎസ് നിയമത്തെയും ബാധിക്കും” എന്ന് കത്തിൽ പറയുന്നു. യുഎസ് മാനുഷിക സഹായം എത്തിക്കുന്നതിന് തടസ്സം നിൽക്കുന്ന രാജ്യങ്ങൾക്ക് സൈനിക സഹായം നൽകുന്നത് നിരോധിക്കുന്ന ഫോറിൻ അസിസ്റ്റൻസ് ആക്ടിലെ സെക്ഷൻ 620i ഉദ്ധരിച്ചായിരുന്നു കത്തിലെ പരാമര്‍ശം. യുഎസ് ആയുധങ്ങൾ ഉപയോഗിക്കുമ്പോൾ അന്താരാഷ്ട്ര നിയമങ്ങൾ പാലിക്കുമെന്ന് സ്റ്റേറ്റ് ഡിപ്പാർട്ട്‌മെൻ്റ് കോൺഗ്രസിന് റിപ്പോർട്ട് ചെയ്യണമെന്ന് ഫെബ്രുവരിയിൽ യുഎസ് പ്രസിഡൻ്റ് ജോ ബൈഡൻ നൽകിയ ദേശീയ സുരക്ഷാ മെമ്മോയും കത്തിൽ ഉദ്ധരിക്കുന്നുണ്ട്.
എന്നിരുന്നാലും, മറുവശത്ത്, അമേരിക്ക അടുത്തിടെ ഇസ്രായേലിൽ വിപുലമായ അമേരിക്കൻ ആൻ്റി മിസൈൽ സംവിധാനം വിന്യസിച്ചതായി ചില റിപ്പോർട്ടുകൾ അവകാശപ്പെടുന്നു. കൂടാതെ, അവ പ്രവര്‍ത്തിപ്പിക്കാന്‍ 100 സൈനികരെയും അയച്ചിട്ടുണ്ട്. ഇത്തരമൊരു സാഹചര്യത്തിൽ അമേരിക്ക ഇസ്രായേലിന് നൽകിയ ഭീഷണി എത്രത്തോളം ഫലപ്രദമാണെന്ന് വിലയിരുത്തേണ്ടി വരും. കാരണം, ഒരു വശത്ത് ഇസ്രായേലിന് മാരകായുധങ്ങള്‍ നല്‍കുകയും മറുവശത്ത് മാനുഷിക മൂല്യങ്ങള്‍ ഉയര്‍ത്തിക്കാട്ടുകയും സമാധാനകാംക്ഷിയായി പ്രവര്‍ത്തിക്കുകയും ചെയ്യുന്നു.
തെക്കൻ ഗാസയിലേക്ക് തങ്ങളുടെ ആക്രമണം വ്യാപിപ്പിക്കാൻ ഇസ്രായേൽ പദ്ധതിയിട്ടതിനാൽ ഈ വർഷം ആദ്യം ഇസ്രായേലിന് ആയിരക്കണക്കിന് ബോംബുകൾ വിതരണം ചെയ്യുന്നത് യുഎസ് ഹ്രസ്വമായി നിർത്തിവച്ചിരുന്നു. എന്നാൽ, നിര്‍ത്തിയതിനേക്കാള്‍ വേഗത്തില്‍ ആയുധ വിതരണം പുനരാരംഭിക്കുകയും ഇസ്രായേലിന് ആയുധങ്ങൾ വിതരണം ചെയ്യുന്നത് ഇപ്പോഴും തുടരുകയും ചെയ്തു. ഇസ്രായേലാകട്ടേ ഗാസയിലും പിന്നീട് ലെബനനിലും ആക്രമണം വർദ്ധിപ്പിക്കുകയും ചെയ്തു.
