തായ്‌ലൻഡിലെ ബാങ്കോക്കിൽ നടന്ന മിസ് ഗ്രാൻഡ് ഇൻ്റർനാഷണൽ 2024ൽ റേച്ചൽ ഗുപ്ത കിരീടം സ്വന്തമാക്കി. 20 വയസ്സുകാരിയായ റേച്ചല്‍, ഈ അഭിമാനകരമായ കിരീടം നേടുന്ന ആദ്യ ഇന്ത്യക്കാരിയായി ചരിത്രം സൃഷ്ടിച്ചു.
എംജിഐ ഹാളിൽ വെച്ചാണ് കിരീടധാരണം നടന്നത് മുന്‍ ടൈറ്റിൽ ഹോൾഡർ പെറുവിൽ നിന്നുള്ള ലൂസിയാന ഫസ്റ്റർ അവർക്ക് കിരീടം സമ്മാനിച്ചു. ഫിലിപ്പീൻസിൽ നിന്നുള്ള ക്രിസ്റ്റിൻ ജൂലിയാൻ ഒപിയാസ (ഒന്നാം റണ്ണറപ്പ്), മ്യാൻമറിൽ നിന്നുള്ള തേ സു നൈൻ (രണ്ടാം റണ്ണർഅപ്പ്), ഫ്രാൻസിൽ നിന്നുള്ള സഫീറ്റോ കബെൻഗെലെ (മൂന്നാം റണ്ണറപ്പ്), ബ്രസീലിൽ നിന്നുള്ള താലിത ഹാർട്ട്മാൻ (നാലാം റണ്ണറപ്പ്) എന്നിവരെയും ആദരിച്ചു.
പഞ്ചാബിലെ ജലന്ധർ സ്വദേശിനിയായ റേച്ചലിന് 5 അടി 10 ഇഞ്ച് ഉയരമുണ്ട്. ഒരു പ്രൊഫഷണൽ മോഡൽ, നടി, സംരംഭക എന്നീ നിലകളില്‍ ശോഭിക്കുന്ന റേച്ചലിന് ഇംഗ്ലീഷ്, ഹിന്ദി, പഞ്ചാബി എന്നീ ഭാഷയും നന്നായി സംസാരിക്കും. അന്താരാഷ്ട്ര കിരീടം നേടുന്നതിന് മുമ്പ്, 2024 ഓഗസ്റ്റ് 11-ന് ജയ്പൂരിൽ നടന്ന ഗ്ലാമാനന്ദ് സൂപ്പർ മോഡൽ ഇന്ത്യ മത്സരത്തിൻ്റെ ദേശീയ ഫൈനലിൽ മിസ് ഗ്രാൻഡ് ഇന്ത്യ 2024 കിരീടം നേടിയിട്ടുണ്ട്. കിരീടം നേടിയതിനു പുറമേ, അവർ നാല് പ്രത്യേക അവാർഡുകളും നേടി: മിസ് ടോപ്പ് മോഡൽ , മിസ് ബ്യൂട്ടി വിത്ത് എ പർപ്പസ്, ബെസ്റ്റ് ഇൻ റാംപ് വാക്ക്, ബെസ്റ്റ് നാഷണൽ കോസ്റ്റ്യൂം.
ലോകത്തിലെ ഏറ്റവും പ്രതീക്ഷയോടെ കാത്തിരിക്കുന്ന സൗന്ദര്യ മത്സരങ്ങളിലൊന്നാണ് മിസ് ഗ്രാൻഡ് ഇൻ്റർനാഷണൽ. തായ് സംരംഭകനായ നവത് ഇറ്റ്സരഗ്രിസിൽ സ്ഥാപിച്ച ഈ മത്സരം വെനിസ്വേല, ഇന്തോനേഷ്യ, യുണൈറ്റഡ് സ്റ്റേറ്റ്സ് എന്നിവയുൾപ്പെടെ വിവിധ രാജ്യങ്ങളിൽ ആതിഥേയത്വം വഹിച്ചിട്ടുണ്ട്. വർഷങ്ങളായി, ആഗോളതലത്തിൽ ഏറ്റവും സുന്ദരിയായ ചില മത്സരാർത്ഥികളെ പ്രദർശിപ്പിച്ചുകൊണ്ട് ഒരു പ്രമുഖ ഫാഷൻ ഇവൻ്റ് എന്ന നിലയിൽ ഇത് പ്രശസ്തി നേടി.
ഇന്ത്യയിൽ, മിസ് ഗ്രാൻഡ് ഇൻ്റർനാഷണലിൻ്റെ പ്രതിനിധികളെ തിരഞ്ഞെടുക്കുന്നതിനുള്ള ഫ്രാഞ്ചൈസി ഗ്ലാമാനന്ദ് ഗ്രൂപ്പിൻ്റെ കൈവശമാണ്. 2013-ൽ സ്ഥാപിതമായതും നിഖിൽ ആനന്ദ് നിയന്ത്രിക്കുന്നതുമായ ഗ്രൂപ്പ് ഗ്രാൻഡ് നാഷണൽ ഫൈനലുകൾക്കും മികച്ച ഫാഷൻ ഡിസൈനർമാരുമായുള്ള സഹകരണത്തിനും പേരുകേട്ടതാണ്. റേച്ചൽ ഗുപ്തയുടെ ചരിത്ര വിജയത്തോടെ ഗ്ലാമാനന്ദ് ഗ്രൂപ്പ് അന്താരാഷ്ട്ര വേദിയിൽ ഇന്ത്യയുടെ അഭിമാനം വാനോളമുയർത്തുന്നു.
