തിരഞ്ഞെടുപ്പ് പിരിമുറുക്കങ്ങൾക്കിടയിൽ, അക്രമത്തിൻ്റെയും അശാന്തിയുടെയും ഭയം അമേരിക്കയിൽ വർദ്ധിച്ചുവരികയാണ്. ഇന്ന് നടക്കുന്ന വോട്ടെടുപ്പിൻ്റെ പശ്ചാത്തലത്തിൽ തലസ്ഥാനമായ വാഷിംഗ്ടൺ ഡിസി ഉൾപ്പെടെ രാജ്യത്തുടനീളം സുരക്ഷാ ക്രമീകരണങ്ങൾ ശക്തമാക്കിയിട്ടുണ്ട്. വ്യാപാര സ്ഥാപനങ്ങൾ അടച്ചിടുകയും വൈറ്റ് ഹൗസിൽ സുരക്ഷ വർധിപ്പിക്കുകയും ചെയ്തിട്ടുണ്ട്. 2020 പോലെയുള്ള അക്രമ സംഭവങ്ങൾ ഇത്തവണയും ആവർത്തിക്കുമോ എന്ന ആശങ്കയിലാണ് ജനങ്ങൾ. തിരഞ്ഞെടുപ്പ് ഫലത്തിന് ശേഷം രാജ്യത്ത് അക്രമത്തിനും ആഭ്യന്തരയുദ്ധത്തിനും സാധ്യതയുണ്ടെന്ന് അടുത്തിടെ നടന്ന ഒരു സർവേ വെളിപ്പെടുത്തുന്നു.
വാഷിംഗ്ടണ്‍: അമേരിക്കയിൽ 2024 ലെ പ്രസിഡൻ്റ് തിരഞ്ഞെടുപ്പുമായി ബന്ധപ്പെട്ട് പിരിമുറുക്കവും അക്രമത്തെക്കുറിച്ചുള്ള ഭയവും വർദ്ധിച്ചുകൊണ്ടിരിക്കുകയാണ്. പ്രസിഡന്റ് സ്ഥാനത്തേക്കുള്ള വോട്ടെടുപ്പ് ഇന്ന് (നവംബർ 5 ന്) രാജ്യത്തുടനീളം നടന്നു. ഇത് കണക്കിലെടുത്ത് കനത്ത സുരക്ഷയാണ് ഒരുക്കിയിരിക്കുന്നത്. വൈറ്റ് ഹൗസിലും സുരക്ഷ വർധിപ്പിച്ചിട്ടുണ്ട്. തന്നെയുമല്ല, അവിടെ ലോക്ക്ഡൗണും ഏർപ്പെടുത്തിയിട്ടുണ്ട്.
2020 ലെ തിരഞ്ഞെടുപ്പ് ഫലത്തിന് ശേഷം അക്രമ സംഭവങ്ങൾ അരങ്ങേറിയത് ജന മനസ്സുകളില്‍ നിന്ന് മാഞ്ഞു പോയിട്ടില്ല. അന്നത്തെ തിരഞ്ഞെടുപ്പ് ഫലങ്ങൾ അംഗീകരിക്കാൻ ഡൊണാൾഡ് ട്രംപ് വിസമ്മതിച്ചതു കാരണം അദ്ദേഹത്തിൻ്റെ അനുയായികൾ ക്യാപിറ്റോൾ ഹില്ലിൽ അക്രമം അഴിച്ചുവിടുകയായിരുന്നു. ഇക്കുറിയും സമാനമായ സാഹചര്യം ഉണ്ടാകുമെന്ന് ആശങ്കയുണ്ട്. തിരഞ്ഞെടുപ്പ് ഫലത്തിന് ശേഷവും അക്രമങ്ങൾ പൊട്ടിപ്പുറപ്പെടുമെന്ന് അടുത്തിടെ നടത്തിയ ഒരു സർവേ അവകാശപ്പെടുന്നു. ഏകദേശം 25% അമേരിക്കക്കാർ കലാപങ്ങൾ ഉണ്ടാകാമെന്ന് വിശ്വസിക്കുന്നു. അതേസമയം, 10% ആഭ്യന്തരയുദ്ധം പോലുള്ള സാഹചര്യത്തെക്കുറിച്ച് ആശങ്കാകുലരാണ്.
2021-ൽ ക്യാപിറ്റോൾ ഹില്ലിൽ നടന്ന ആക്രമണത്തിൻ്റെ ഓർമ്മകൾ ഇപ്പോഴും പുതുമയുള്ളതാണ്. അടുത്തിടെ നടന്ന തിരഞ്ഞെടുപ്പ് പ്രചാരണത്തിനിടെ അക്രമാസക്തമായ സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്, അതിലൊന്ന് പെൻസിൽവാനിയയിലെ ബട്ലറിൽ ട്രംപ് റാലിക്ക് നേരെ വെടിയുതിർത്തതും അദ്ദേഹത്തിന് പരിക്കേല്‍ക്കുകയും ചെയ്തതാണ്. ഈ ആക്രമണത്തിൽ ഒരാൾ കൊല്ലപ്പെടുകയും രണ്ട് പേർക്ക് പരിക്കേൽക്കുകയും ചെയ്തു. ഇത്തരം സംഭവങ്ങൾ വോട്ടർമാർക്കിടയിൽ ഭയത്തിൻ്റെയും അനിശ്ചിതത്വത്തിൻ്റെയും അന്തരീക്ഷം സൃഷ്ടിച്ചിട്ടുണ്ട്.
ഫലം ട്രംപിന് എതിരായാൽ അദ്ദേഹത്തിൻ്റെ അനുയായികൾ അക്രമാസക്തമാകുമെന്ന് ഡെമോക്രാറ്റിക് സെനറ്റര്‍ സ്റ്റീവ് കോഹൻ ആശങ്ക പ്രകടിപ്പിച്ചു. “സാഹചര്യം വഷളായേക്കാം, രക്തച്ചൊരിച്ചിൽ ഉണ്ടാകാം,” അദ്ദേഹം പറഞ്ഞു. ക്യാപിറ്റോൾ ഹില്ലിൽ ഒരിക്കൽ കൂടി ഒത്തുകൂടാൻ ട്രംപിന് തൻ്റെ അനുയായികളെ പ്രേരിപ്പിക്കാമെന്നും കോഹൻ മുന്നറിയിപ്പ് നൽകി. തിരഞ്ഞെടുപ്പ് പരാജയം ട്രംപ് അംഗീകരിച്ചില്ലെങ്കിൽ അദ്ദേഹത്തെ പിന്തുണയ്ക്കുന്നവരുടെ പ്രതികരണം വളരെ ഗുരുതരമായിരിക്കുമെന്നും അവർ ഭയപ്പെടുന്നു.
തെരഞ്ഞെടുപ്പിന് മുമ്പ് തന്നെ ചില പോളിങ് സ്റ്റേഷനുകളിൽ അക്രമസംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. വെടിവയ്പ്പും മറ്റ് അക്രമ സംഭവങ്ങളും നേരിടാൻ സുരക്ഷാ ഏജൻസികൾ ജാഗ്രതയിലാണ്. ഇതിന് പുറമെ നിരവധി രാഷ്ട്രീയ ഓഫീസുകൾക്കും പ്രധാന സ്ഥാപനങ്ങൾക്കും ബോംബ് ഭീഷണിയും ലഭിച്ചിട്ടുണ്ട്. ഇതെല്ലാം സ്ഥിതി കൂടുതൽ ഗുരുതരമാക്കുകയാണ്. അനിഷ്ട സംഭവങ്ങൾ ഒഴിവാക്കാൻ പോലീസും മറ്റ് സുരക്ഷാ സേനയും കനത്ത ജാഗ്രതയിലാണ്. ഈ തിരഞ്ഞെടുപ്പിൽ, അമേരിക്ക വീണ്ടും രാഷ്ട്രീയ സാമൂഹിക അസ്ഥിരതയുടെ ഒരു കാലഘട്ടത്തിലേക്ക് പ്രവേശിക്കുന്നതായി തോന്നുന്നു. 2020ലെ സംഭവങ്ങൾ ആവർത്തിക്കുമോയെന്ന ഭയം പൊതുജനങ്ങൾക്കിടയിൽ നിലനിൽക്കുന്നുണ്ട്.
