ധാക്ക : പ്രദേശത്ത് തുടരുന്ന പ്രതിഷേധങ്ങൾക്കും അക്രമങ്ങൾക്കും ഇടയിൽ ബംഗ്ലാദേശിലെ ചാട്ടോഗ്രാമിൽ മൂന്ന് ഹിന്ദു ക്ഷേത്രങ്ങൾ ജനക്കൂട്ടം തകർത്തു. വെള്ളിയാഴ്ച ഉച്ചകഴിഞ്ഞ് 2.30 ഓടെ ഹരീഷ് ചന്ദ്ര മുൻസെഫ് ലെയ്ൻ ഏരിയയിൽ സന്താനേശ്വര്‍ മാത്രി ക്ഷേത്രം, ഷോണി ക്ഷേത്രം, ശാന്തനേശ്വരി കാളിബാരി ക്ഷേത്രം എന്നിവ ലക്ഷ്യമാക്കിയാണ് ആക്രമണം നടന്നത്.
റിപ്പോർട്ടുകൾ പ്രകാരം, വെള്ളിയാഴ്ച ജുമുഅഃ പ്രാർത്ഥനക്ക് ശേഷം നൂറു കണക്കിന് പേരടങ്ങുന്ന ഒരു സംഘം ക്ഷേത്രങ്ങളെ ലക്ഷ്യമാക്കി ഇഷ്ടികകളും കല്ലുകളും എറിയുകയും ഷോണി ക്ഷേത്രത്തിനും മറ്റ് രണ്ട് ക്ഷേത്രങ്ങളുടെ ഗേറ്റുകൾക്കും കേടുപാടുകൾ വരുത്തുകയും ചെയ്തു.
തകർന്ന കവാടങ്ങളും മറ്റ് നശിപ്പിക്കപ്പെട്ട ഘടനകളും ഉൾപ്പെടുന്ന നാശനഷ്ടങ്ങളുടെ വ്യാപ്തി ക്ഷേത്ര അധികാരികൾ സ്ഥിരീകരിച്ചു. ആക്രമണം സ്ഥിരീകരിച്ച കോട്വാലി പോലീസ് സ്റ്റേഷൻ മേധാവി അബ്ദുൾ കരീം, ക്ഷേത്രങ്ങൾ തകർക്കാൻ അക്രമികൾ ബോധപൂർവം ശ്രമിക്കുകയായിരുന്നു എന്ന് പറഞ്ഞു.
സന്താനേശ്വര്‍ മാത്രി ക്ഷേത്ര ഭരണ സമിതിയിലെ സ്ഥിരം അംഗമായ തപൻ ദാസ്, അക്രമികൾ ഹിന്ദു വിരുദ്ധ മുദ്രാവാക്യങ്ങളും ഇസ്‌കോൺ വിരുദ്ധ മുദ്രാവാക്യങ്ങളും വിളിക്കാൻ തുടങ്ങിയതായി പറഞ്ഞു.
ബംഗ്ലാദേശ് ദേശീയ പതാകയെ അനാദരിച്ചു എന്നാരോപിച്ച് കസ്റ്റഡിയിലെടുത്ത ഇൻ്റർനാഷണൽ സൊസൈറ്റി ഫോർ കൃഷ്ണ കോൺഷ്യസ്‌നസിൻ്റെ (ഇസ്‌കോൺ) മുൻ അംഗം ചിൻമോയ് കൃഷ്ണ ദാസ് അറസ്റ്റിലായതു മുതൽ ചാറ്റോഗ്രാമിൽ അക്രമം പൊട്ടിപ്പുറപ്പെടുകയാണ്. അദ്ദേഹത്തിൻ്റെ അറസ്റ്റിനെ ചുറ്റിപ്പറ്റിയുള്ള പ്രതിഷേധങ്ങളും അശാന്തിയും മേഖലയിൽ സംഘർഷം വർധിപ്പിച്ചിട്ടുണ്ട്.
ആക്രമണസമയത്ത് ക്ഷേത്ര അധികാരികൾ അക്രമികളുമായി ഇടപഴകിയില്ലെന്നും സ്ഥിതി വഷളായതിനാൽ സൈനിക സഹായം ആവശ്യപ്പെട്ടതായും തപൻ ദാസ് വെളിപ്പെടുത്തി.
സൈന്യം ഉടനടി പ്രതികരിക്കുകയും ക്രമസമാധാനം പുനഃസ്ഥാപിക്കാൻ സഹായിക്കുകയും ചെയ്തു. ജനക്കൂട്ടം എത്തിയപ്പോഴേക്കും ക്ഷേത്ര കവാടങ്ങൾ സുരക്ഷിതമാക്കിയിരുന്നുവെങ്കിലും കെട്ടിടങ്ങൾക്ക് കേടുപാടുകൾ സംഭവിച്ചിരുന്നു. റിപ്പോർട്ടുകൾ പ്രകാരം, ആക്രമണം പ്രകോപനമില്ലാതെയായിരുന്നുവെന്നും ക്ഷേത്രജീവനക്കാരുടെ ഭാഗത്തുനിന്ന് കാര്യമായ ചെറുത്തുനിൽപ്പൊന്നും ഉണ്ടായിട്ടില്ലെന്നും പറയുന്നു.
ബംഗ്ലാദേശിലെ ഹിന്ദുക്കളും ക്രിസ്ത്യാനികളും ബുദ്ധമതക്കാരും ഉൾപ്പെടെയുള്ള മതന്യൂനപക്ഷങ്ങളുടെ സുരക്ഷയെക്കുറിച്ച് ഈ സംഭവം ഗുരുതരമായ ആശങ്കകൾ ഉയർത്തിയിട്ടുണ്ട്.
