ന്യൂഡൽഹി: രാജ്യസഭയിൽ ഭരണഘടനാദിന പ്രസംഗത്തിനിടെ കേന്ദ്ര ആഭ്യന്തരമന്ത്രി അമിത് ഷാ നടത്തിയ പരാമർശങ്ങൾ അടിയന്തരമായി ചർച്ച ചെയ്യണമെന്ന് ആവശ്യപ്പെട്ട് കോൺഗ്രസ് എംപി മാണിക്കം ടാഗോർ ലോക്‌സഭയിൽ അടിയന്തര പ്രമേയ നോട്ടീസ് സമർപ്പിച്ചു.
ഡോ. ബി.ആർ. അംബേദ്കർ ഉയർത്തിപ്പിടിച്ച സാമൂഹിക നീതിയുടെയും സമത്വത്തിൻ്റെയും തത്ത്വങ്ങളെ അദ്ദേഹത്തിൻ്റെ പരാമർശങ്ങൾ അട്ടിമറിക്കുന്നുവെന്ന് ആരോപിച്ച് അമിത് ഷാ മാപ്പ് പറയണമെന്നും രാജിവെക്കണമെന്നും ടാഗോർ ആവശ്യപ്പെട്ടു.
അംബേദ്കർ തൻ്റെ ജീവിതത്തിലുടനീളം പോരാടിയ സാമൂഹ്യനീതിയുടെയും സമത്വത്തിൻ്റെയും തത്വങ്ങളോടുള്ള ആഴത്തിലുള്ള അവഗണനയുടെ പ്രതിഫലനവും “അസ്വീകാര്യവും” എന്നാണ് ഷായുടെ പരാമർശങ്ങളെ ടാഗോർ വിശേഷിപ്പിച്ചത്.
പ്രധാനമന്ത്രി നരേന്ദ്രമോദി അടിയന്തര നടപടി സ്വീകരിക്കണമെന്നും അമിത് ഷായെ തൽസ്ഥാനത്ത് നിന്ന് മാറ്റണമെന്നും അദ്ദേഹം അഭ്യർത്ഥിച്ചു.
“തൻ്റെ പരാമർശത്തിന് അമിത് ഷാ നിരുപാധികം മാപ്പ് പറയണമെന്നും കേന്ദ്ര ആഭ്യന്തര മന്ത്രി സ്ഥാനം രാജിവയ്ക്കണമെന്നും ഞാൻ ആവശ്യപ്പെടുന്നു. മന്ത്രിസഭയിലെ അദ്ദേഹത്തിൻ്റെ സാന്നിധ്യം ഭരണഘടനയുടെയും ഇന്ത്യൻ ജനതയുടെയും അന്തസ്സിനു നേരെയുള്ള അവഹേളനമാണ്,” ടാഗോർ തൻ്റെ നോട്ടീസിൽ കുറിച്ചു.
ഷായുടെ പരാമർശങ്ങളെ “കഴിയുന്ന ശക്തമായ ഭാഷയിൽ” അപലപിക്കാൻ കോൺഗ്രസ് നേതാവ് സഭയോട് ആവശ്യപ്പെട്ടു.
അംബേദ്കറിനോട് അനാദരവുള്ളതും ദശലക്ഷക്കണക്കിന് ഇന്ത്യക്കാർക്ക്, പ്രത്യേകിച്ച് ദളിത് സമൂഹത്തിന് അപമാനകരവുമായ പരാമർശങ്ങളാണെന്ന് ഊന്നിപ്പറഞ്ഞുകൊണ്ട് ടാഗോർ വ്യാഴാഴ്ച സമാനമായ അഡ്‌ജോൺമെൻ്റ് മോഷൻ നോട്ടീസ് സമർപ്പിച്ചിരുന്നു. “അടിയന്തിര പൊതു പ്രാധാന്യം” എന്നാണ് അദ്ദേഹം ഈ വിഷയത്തെ വിശേഷിപ്പിച്ചത്.
ഭരണഘടനാ ദിന പ്രസംഗത്തിൽ ഷായുടെ പ്രസ്താവനകൾ ഇന്ത്യൻ ഭരണഘടനയുടെ പ്രധാന ശില്പിയായ ഡോ. അംബേദ്കറെ അപമാനിക്കുകയും രേഖയിൽ പ്രതിപാദിച്ചിരിക്കുന്ന നീതി, സമത്വം, സാമൂഹിക ഐക്യം എന്നിവയുടെ ആശയങ്ങൾക്ക് കളങ്കമുണ്ടാക്കുകയും ചെയ്തുവെന്ന് അദ്ദേഹം ആരോപിച്ചു.
അതേസമയം, കേന്ദ്രമന്ത്രിയെ മന്ത്രിസഭയിൽ നിന്ന് പുറത്താക്കണമെന്ന് ആവശ്യപ്പെട്ട് ഇന്ത്യാ ബ്ലോക്കും കേന്ദ്രമന്ത്രിക്കെതിരെ പ്രതിഷേധ മാർച്ചും നടത്തി.
