1971-ൽ കിഴക്കൻ പാക്കിസ്താനില്‍ നിന്ന് തുരത്തിയ പാക് സൈന്യം 53 വർഷത്തിന് ശേഷം ബംഗ്ലാദേശിലേക്ക് മടങ്ങാൻ തയ്യാറെടുക്കുകയാണ്. രഹസ്യാന്വേഷണ ഏജൻസികളുടെ റിപ്പോർട്ടുകൾ പ്രകാരം പാക്കിസ്താന്‍ ജോയിൻ്റ് ചീഫ് ഓഫ് സ്റ്റാഫ് കമ്മിറ്റി ചെയർമാൻ ജനറൽ സാഹിർ ഷംഷാദ് മിർസ ബംഗ്ലാദേശിന് നിർദ്ദേശം അയച്ചിട്ടുണ്ട്.
ഈ നിർദ്ദേശത്തിൽ, ജനറൽ മിർസ ബംഗ്ലാദേശ് ആർമിയുടെ വിവിധ പരിശീലന സ്ഥാപനങ്ങളായ ഇൻഫൻട്രി ആൻഡ് ടാക്‌റ്റിക് സ്‌കൂൾ, ഡിഫൻസ് സർവീസ് കമാൻഡ് എന്നിവ സന്ദർശിക്കാനുള്ള ആഗ്രഹം പ്രകടിപ്പിച്ചു. കൂടാതെ, ബംഗ്ലാദേശ് ആർമിയിലെ സ്റ്റാഫ് കോളേജിലെ യുവ ഓഫീസർമാരെ അതിഥി സ്പീക്കറായി അഭിസംബോധന ചെയ്യാൻ അദ്ദേഹം ആഗ്രഹിക്കുന്നു.
ബംഗ്ലാദേശ് സർക്കാർ ഈ നിർദ്ദേശം അംഗീകരിച്ചതായും ഒരു റൗണ്ട് ചർച്ചകൾ നടന്നതായും റിപ്പോർട്ടിൽ പറയുന്നു. എന്നാൽ, പര്യടന തീയതി ഇതുവരെ പ്രഖ്യാപിച്ചിട്ടില്ല.
ഷെയ്ഖ് ഹസീന സർക്കാരിന് ശേഷം ബംഗ്ലാദേശും പാക്കിസ്താനും തമ്മിലുള്ള ബന്ധം വീണ്ടും ശക്തമാവുകയാണ്. 2022ൽ ഷെയ്ഖ് ഹസീന പാക് യുദ്ധക്കപ്പൽ പിഎൻഎസ് തൈമൂറിനെ ചിറ്റഗോങ് തുറമുഖത്ത് ഡോക്ക് ചെയ്യാൻ അനുവദിച്ചില്ല. എന്നാൽ ഇപ്പോൾ സ്ഥിതി മാറി.
ബംഗാൾ ഉൾക്കടലിൽ ബംഗ്ലാദേശും പാക്കിസ്താനും സംയുക്ത നാവികാഭ്യാസത്തിന് തയ്യാറെടുക്കുകയാണെന്നാണ് റിപ്പോർട്ട്. ഇത് കൂടാതെ 2025 ഫെബ്രുവരിയിൽ കറാച്ചിയിൽ നടക്കുന്ന ബഹുരാഷ്ട്ര നാവിക അഭ്യാസമായ ‘അമാൻ 2025’ലും ബംഗ്ലാദേശ് പങ്കെടുക്കും.
ഷെയ്ഖ് ഹസീനയുടെ സർക്കാരിൻ്റെ പതനത്തിനുശേഷം, ബംഗ്ലാദേശിലെ ഇടക്കാല സർക്കാർ പാക്കിസ്താനുമായുള്ള ബന്ധം ശക്തിപ്പെടുത്തുന്നതിന് നിരവധി നടപടികൾ സ്വീകരിച്ചു. കഴിഞ്ഞ അഞ്ച് വർഷമായി അടച്ചിട്ടിരുന്ന ഇസ്ലാമാബാദിൽ നിന്ന് ധാക്കയിലേക്കുള്ള നേരിട്ടുള്ള വിമാനം പുനരാരംഭിക്കുമെന്ന് പ്രഖ്യാപിച്ചു. പാക്കിസ്താനികൾക്കുള്ള വിസ നിയമങ്ങൾ ബംഗ്ലാദേശ് ലളിതമാക്കി. ജനുവരിയിൽ നടക്കുന്ന വ്യാപാര പ്രദർശനത്തിനായി ബംഗ്ലാദേശ് പാക്കിസ്താനെ ക്ഷണിച്ചിട്ടുണ്ട്. പാക്കിസ്താനില്‍ നിന്ന് വരുന്ന ചരക്ക് കപ്പലുകൾക്ക് ഇനി ചിറ്റഗോംഗ് തുറമുഖത്ത് പരിശോധന കൂടാതെ നേരിട്ട് എത്തിച്ചേരാനാകും.
ബംഗ്ലാദേശിൽ സർക്കാർ മാറ്റാനുള്ള ഗൂഢാലോചനയിൽ പാക് രഹസ്യാന്വേഷണ ഏജൻസിയായ ഐഎസ്ഐയുടെ പങ്ക് ഇതോടെ വ്യക്തമായി. ബംഗ്ലാദേശിൽ ഷെയ്ഖ് ഹസീനയുടെ സർക്കാരിൻ്റെ പതനത്തിൽ ഐഎസ്ഐ പ്രധാന പങ്ക് വഹിച്ചിരുന്നു. ഇന്ത്യയും ബംഗ്ലാദേശും തമ്മിലുള്ള ബന്ധം തകർക്കാൻ പാക്കിസ്താന്‍ ഏറെ നാളുകളായി ശ്രമിച്ചുകൊണ്ടിരിക്കുകയാണ്. നേരിട്ടുള്ള വിമാന സർവീസുകൾ പുനരാരംഭിച്ചതോടെ ഐഎസ്ഐ ഏജൻ്റുമാരുടെ നീക്കം ഇപ്പോൾ എളുപ്പമായി.
നേരത്തെ ഐഎസ്ഐ ബംഗ്ലാദേശിൽ തങ്ങളുടെ പ്രവർത്തനങ്ങൾ രഹസ്യമായി നടത്തിയിരുന്നതായി പ്രതിരോധ വിദഗ്ധൻ മേജർ ജനറൽ അശോക് കുമാർ (റിട്ട.) പറയുന്നു. ഇപ്പോൾ ഈ സർക്കാരിൽ അവര്‍ ഇന്ത്യാ വിരുദ്ധ പ്രവർത്തനങ്ങൾ പരസ്യമായി നടത്തും. ഇത്തരമൊരു സാഹചര്യത്തിൽ ഇന്ത്യക്ക് ഇത് വലിയ വെല്ലുവിളിയായി മാറും.
