ഫിലഡല്‍ഫിയ: രണ്ടായിരത്തി ഒന്‍പതില്‍ ഫിലഡല്‍ഫിയയില്‍ തുടക്കം കുറിച്ച് ഇന്ന് ലോകത്തിന്‍റെവിവിധ ഭാഗങ്ങളില്‍ പടര്‍ന്നു പന്തലിച്ചിരിക്കുന്ന ഓര്‍മ ഇന്റര്നാഷണലിന്റെ 2025 2026 ലേക്കുള്ള പുതിയ ഭാരവാഹികള്‍ സ്ഥാനമേറ്റു.
വിദേശ മലയാളികള്‍ക്ക്സാംസ്കാരിക വേദികള്‍ ഒരുക്കികൊണ്ടും, അവരുടെ സാമൂഹിക പ്രശ്നങ്ങളില്‍ ശക്തമായി ഇടപെട്ടുകൊണ്ടും, കുടുംബ മൂല്യങ്ങള്‍ക്ക് പ്രാധാന്യം നല്‍കികൊണ്ട് അവരെ ഒരു കുടകീഴില്‍ അണിനിരുത്തുകയാണ് ഓവര്‍സീസ് റസിഡന്റ് മലയാളി അസ്സോസിയേഷന്‍ അഥവാ ORMA ചെയ്യുന്നത്. ORMA അന്താരാഷ്ട്ര പ്രസംഗ മത്സരത്തിലൂടെ ലോകമെമ്പാടുമുള്ള മലയാളികളുടെ മനസ്സില്‍ കുടിയേറിയ ഒരു മലയാളി സംഘടനയാണ് ഓര്‍മ്മ ഇന്റര്നാഷണല്. പത്തു ലക്ഷം രൂപയുടെ സമ്മാനങ്ങളോടൊപ്പം, രണ്ട് ഘട്ടങ്ങളിലായി, പബ്ലിക് സ്പീകിംഗ് പരിശീലന പരമ്പര നൽകിക്കൊണ്ടു പ്രസംഗമത്സരം നടത്തുന്ന ആദ്യത്തെ സംഘടനയെന്ന ബഹുമതിയും ഓർമയ്ക്ക് മാത്രം അവകാശപ്പടാവുന്നതാണ്.
സജി സെബാസ്റ്റ്യൻ പ്രസിഡന്റ്, ക്രിസ്റ്റി എബ്രഹാം സെക്രട്ടറി, റോഷൻ പ്ലാമൂട്ടിൽ ട്രഷറർ എന്നിവരടങ്ങുന്ന യുവ നേതൃത്വം ഐക്യകണ്ഠമായാണ് തെരഞ്ഞെടുക്കെപ്പട്ടത്. ഓർമ ഇന്റർനാഷണൽ പ്രസിഡന്റായി തെരഞ്ഞെടുക്കെപ്പട്ട സജി സെബാസ്റ്റ്യൻ ഓർമ ടാലന്റ്‌റ് ഫോറം ഫിനാൻസ് ഓഫീസറായി പ്രവർത്തിച്ചു വരികയായിരുന്നു. ഫിലാഡൽഫിയ സെന്റ് തോമസ് കാത്തോലിക് ഫൊറാന പള്ളി ട്രസ്റ്റി ആയി രണ്ടാം തവണ പ്രവർത്തിച്ചുവരുന്നു. ഒപ്പം ഇരുപതു വർഷമായി അമേരിക്കൻ മലയാളി പോസ്റ്റൽ എംപ്ലോയീസ് അസോസിയേഷൻ ജനറൽ കോ -ഓർഡിനേറ്റർ ആയും സ്തുത്യർഹമായ നേതൃത്വം നൽകിവരുന്നു. ജനറൽ സെക്രട്ടറി ആയി ചുമതല ഏറ്റെടുത്തിരിക്കുന്ന ക്രിസ്റ്റി എബ്രഹാം കഴിഞ്ഞ 35 വർഷമായി ഫിലാഡെൽഫിയ സ്വദേശിനിയും മലയാള സാമൂഹിക സംസ്‌കാരിക വേദികളിൽ ഒരു യുവ സാനിധ്യവുമാണ്. റോഷൻ പ്ലാമൂട്ടിൽ നാടക നടൻ, സംഘാടകൻ, വിവിധ സംഘടനകളിലെ ഭാരവാഹി എന്നീ നിലകളിൽ പ്രസിദ്ധനാണ്.
ജോസ് ആറ്റുപുറം (ബോർഡ് ഓഫ് ട്രസ്റ്റി ചെയർമാൻ), ജോസ് തോമസ് (ടാലന്റ്‌റ് ഫോറം), അറ്റോർണി ജോസ് കുന്നേൽ (ലീഗൽ ഫോറം), വിൻസെന്റ് ഇമ്മാനുവേൽ (പബ്ലിക് ആൻഡ് പൊളിറ്റിക്കൽ അഫേഴ്‌സ് ഫോറം), അരുൺ കോവാട്ട് (മീഡിയ ഫോറം) എന്നിവർ ഫോറം ചെയർമാൻമാരായി തുടരും. ജോർജ് നടവയൽ, ഷാജി അഗസ്റ്റിൻ എന്നിവർ എക്‌സ് -ഒഫീഷ്യൽസുമായി തെരഞ്ഞെടുക്കെപ്പട്ടു. വിവിധ ഓർമ ചാപ്റ്ററുകളുടെയും, റീജിയണുകളുടെയും നിലവിലുള്ള ഭാരവാഹികൾ തുടർന്നും നേതൃത്വം നൽകുന്നതാണ്.
