45 കമ്പനികളിൽ നിന്നായി 68 ടീമുകൾ പങ്കെടുക്കുന്ന 3 ആഴ്ച്ച നീണ്ടുനിൽക്കുന്ന ഫുട്ബോൾ ടൂർണമെന്റിന്റെ എട്ടാം പതിപ്പിനാണ് യു എസ് ടി ആതിഥ്യം വഹിക്കുന്നത്.
കൊച്ചി, 9 ജനുവരി 2025: പ്രമുഖ ഡിജിറ്റൽ ട്രാൻസ്ഫർമേഷൻ സൊല്യൂഷൻസ് കമ്പനിയായ യു എസ് ടി സംഘടിപ്പിക്കുന്ന അന്തർ-സ്ഥാപന ഫുട്ബോൾ ചാമ്പ്യൻഷിപ്പായ ‘യു എസ് ടി ഗോൾ’ കൊച്ചിയിലെ ഇൻഫോപാർക്കിൽ തുടക്കമായി. ഇൻഫോപാർക്കിന്റെ ഇരുപതാം വാർഷികാഘോഷങ്ങളുടെ ഭാഗമായാണ് യു എസ് ടി ഗോൾ ഫുട്ബോൾ ചാമ്പ്യൻഷിപ്പിന്റെ എട്ടാം പതിപ്പ് സംഘടിപ്പിക്കുന്നത്.
ഇൻഫോപാർക്കിലെ ഫേസ് 2-ലെ, സൻസ്കാര സ്കൂൾ മൈതാനത്താണ് യു എസ് ടി ഗോൾ അരങ്ങേറുന്നത്. കൊച്ചിയിലെ ഐ ടി സമൂഹത്തെത്തിന്റെ കായികപ്രതിഭയും, സ്പോർട്സ്മാൻ സ്പിരിറ്റും ഒരുമിച്ചു കൊണ്ടുവരുന്നതാണീ ഫുട്ബോൾ ടൂർണ്ണമെന്റ്.
മൂന്ന് ആഴ്ച്ച നീണ്ടുനിൽക്കുന്ന ടൂർണ്ണമെൻറ്റിൽ 45 കമ്പനികളിലെ 68 ടീമുകൾ 117 മത്സരങ്ങളിലായി പങ്കെടുക്കും. പുരുഷ, വനിത, മാസ്റ്റേഴ്സ് എന്നീ മൂന്ന് വിഭാഗങ്ങളിലായാണ് മത്സരങ്ങൾ സംഘടിപ്പിക്കുന്നത്. പുരുഷവിഭാഗത്തിൽ 9 മുൻനിര ടീമുകൾ മാറ്റുരയ്ക്കുമ്പോൾ, വനിതാ വിഭാഗത്തിൽ 5 മുൻനിര ടീമുകളാണ് മത്സരിക്കുന്നത്. മാസ്റ്റേഴ്സ് വിഭാഗത്തിൽ 7 മുൻനിര ടീമുകൾ തമ്മിലാണ് പോരാട്ടം.
പുരുഷവിഭാഗത്തിൽ മത്സരങ്ങൾ 2025 ജനുവരി 6-ന് ആരംഭമായി. വനിതാ വിഭാഗത്തിലെയും, മാസ്റ്റേഴ്സ് വിഭാഗത്തിലേയും മത്സരങ്ങൾ 2025 ജനുവരി 9-നും ആരംഭിക്കും. ജനുവരി 23-നാണ് ഫൈനൽ മത്സരങ്ങൾ നടക്കുന്നത്.
കൊച്ചി ഇൻഫോപാർക്ക്, കൊരട്ടി ഇൻഫോപാർക്ക്, സ്മാർട്ട് സിറ്റി എന്നിവിടങ്ങളിൽ നിന്നാണ് മൂന്ന് ആഴ്ച്ച നീണ്ടു നിൽക്കുന്ന ഫുട്ബോൾ ടൂർണ്ണമെന്റിൽ പങ്കെടുക്കുന്ന ടീമുകൾ എത്തുന്നത്.
2007-ൽ തിരുവനന്തപുരം ടെക്നോപാർക്കിലാണ് യു എസ് ടി ഗോൾ ഫുട്ബോൾ ടൂർണമെന്റിന്റെ ആദ്യ പതിപ്പ് ആരംഭിച്ചത്. പിന്നീട് 2012-ൽ ടൂർണ്ണമെന്റിന്റെ കൊച്ചി പതിപ്പിനും തുടക്കമായി. വർഷങ്ങളായി കോർപ്പറേറ്റ് സമൂഹത്തിന്റെയിടയിലെ കായിക സംസ്കാരം വളർത്തുക എന്ന പ്രധാന ദൗത്യം നിറവേറ്റിവരുകയാണ് യു എസ് ടി ഗോൾ. കൊച്ചിയിൽ നടന്ന എസ ടി ഗോളിന്റെ കഴിഞ്ഞ പതിപ്പിൽ പുരുഷവിഭാഗത്തിൽ 32 ടീമുകളും, വനിതാ വിഭാഗത്തിൽ 12 ടീമുകളും, മാസ്റ്റേഴ്സ് വിഭാഗത്തിൽ 5 ടീമുകളും പങ്കെടുത്തു.
യു എസ് ടി ഗോളിന്റെ ഉത്‌ഘാടന ചടങ്ങിൽ യു എസ് ടി ചീഫ് വാല്യൂസ് ഓഫീസറും, സെന്റർ ഓപ്പറേഷൻസ് ആഗോള മേധാവിയുമായ സുനിൽ ബാലകൃഷ്ണൻ, ഇൻഫോപാർക്ക്സ് കേരള ചീഫ് എക്സിക്യൂട്ടീവ് ഓഫീസർ സുശാന്ത് കുരുന്തിൽ, മറ്റ് വിശിഷ്ട്ട വ്യക്തികൾ തുടങ്ങിയവർ പങ്കെടുത്തു.
