വാഷിംഗ്ടൺ: നാല് ഇന്ത്യൻ കമ്പനികൾ ഉള്‍പ്പടെ ഇറാനിലെ 16 കമ്പനികള്‍ക്ക് അമേരിക്ക നിരോധനം ഏര്‍പ്പെടുത്തി. ഇറാന്റെ എണ്ണ, പെട്രോകെമിക്കൽ വ്യവസായത്തിൽ ഇന്ത്യൻ കമ്പനികൾക്കുള്ള പങ്കാളിത്തമാണ് വിലക്കിന് കാരണം.
യുഎസ് ധനകാര്യ മന്ത്രാലയം പുറത്തിറക്കിയ പ്രസ്താവന പ്രകാരം, നിരോധിക്കപ്പെട്ട ഇന്ത്യൻ കമ്പനികളിൽ ഓസ്റ്റിൻഷിപ്പ് മാനേജ്മെന്റ് പ്രൈവറ്റ് ലിമിറ്റഡ്, ബിഎസ്എം മറൈൻ എൽഎൽപി, കോസ്മോസ് ലൈൻസ് ഇൻകോർപ്പറേറ്റഡ്, ഫ്ലക്സ് മാരിടൈം എൽഎൽപി എന്നിവ ഉൾപ്പെടുന്നു.
ഫെബ്രുവരി 4 ന് യുഎസ് പ്രസിഡന്റ് ഡൊണാൾഡ് ട്രംപ് ദേശീയ സുരക്ഷാ മെമ്മോറാണ്ടം പുറപ്പെടുവിച്ചതിനുശേഷം ഇറാനിയൻ എണ്ണ വിൽപ്പന ലക്ഷ്യമിട്ടുള്ള രണ്ടാം ഘട്ട ഉപരോധമാണിത്. ഇറാനുമേൽ പരമാവധി സമ്മർദ്ദം ചെലുത്തുക എന്നതാണ് യുഎസ് ഉപരോധങ്ങൾക്ക് പിന്നിലെ ലക്ഷ്യം.
ഇറാന്റെ എണ്ണ, പെട്രോകെമിക്കൽ വ്യവസായവുമായുള്ള ബന്ധത്തിന്റെ പേരിൽ 16 കമ്പനികളെയും കപ്പലുകളെയും യുഎസ് നിരോധിക്കുന്നതായി പ്രസ്താവനയിൽ പറയുന്നു. ഇറാനിയൻ എണ്ണ കയറ്റുന്നതിലും കൊണ്ടുപോകുന്നതിലും ഉള്ള പങ്ക് മറച്ചുവെച്ചുകൊണ്ട് ഈ നിയമവിരുദ്ധ ഷിപ്പിംഗ് ശൃംഖല ഏഷ്യയിലെ വാങ്ങുന്നവരെ വഞ്ചിക്കുകയായിരുന്നു. എണ്ണ വരുമാനം ഇറാൻ ഭീകര പ്രവർത്തനങ്ങൾക്ക് ധനസഹായം നൽകുന്നത് തടയാൻ അമേരിക്ക ഇത്തരം നടപടികൾ തുടരുമെന്ന് പറയുന്നു.
ഉക്രെയ്‌നിനെതിരായ യുദ്ധത്തിന്റെ മൂന്ന് വർഷം തികയുന്ന വേളയിൽ, ഇന്ത്യൻ കമ്പനിക്ക് മേൽ യുകെ ഉപരോധം ഏർപ്പെടുത്തി. റഷ്യയ്‌ക്കെതിരെ ഇതുവരെയുള്ളതിൽ വച്ച് ഏറ്റവും വലിയ ഉപരോധമാണ് തിങ്കളാഴ്ച യുകെ ഏർപ്പെടുത്തിയത്. മോസ്കോയിലേക്ക് സൈനിക സാമഗ്രികൾ എത്തിച്ചു നൽകുന്ന ഇന്ത്യൻ കമ്പനിയായ ഇൻസിയ ഇംപെക്സ് പ്രൈവറ്റ് ലിമിറ്റഡിനെയും നിരോധിച്ചിട്ടുണ്ട്.
ഇതിനു കീഴിൽ, റഷ്യൻ സൈന്യത്തിനായുള്ള ഇലക്ട്രോണിക്സ്, ഇരട്ട ഉപയോഗ വസ്തുക്കൾ, യന്ത്ര ഉപകരണങ്ങൾ, ആയുധങ്ങളിൽ ഉപയോഗിക്കുന്ന മൈക്രോപ്രൊസസ്സറുകൾ എന്നിവ നിർമ്മിക്കുന്നവരെയും വിതരണക്കാരെയും ലക്ഷ്യം വച്ചിട്ടുണ്ട്. ഇതിൽ തുർക്കി, തായ്‌ലൻഡ്, ഇന്ത്യ, ചൈന എന്നീ രാജ്യങ്ങളും ഉൾപ്പെടുന്നു.
