സ്വർഗ്ഗസ്ഥനായ പിതാവേ, പ്രപഞ്ചത്തിൻ
സർഗ്ഗ ചൈതന്യ പ്രഭാ പൂരമേ ,
വസ്തുവാം സ്ഥൂല പ്രപഞ്ച ഭാവത്തിലെ
മുഗ്ദ ചൈതന്യമാം യാഥാർഥ്യമേ,
ഞാനായ തന്മാത്രാ ഖണ്ഡത്തിലുൾച്ചേർന്ന
ജ്ഞാനോദത്തിന്റെ വിശ്വ രൂപം
ചൂടി നിൽക്കുന്നു ചലനമായ്‌ സത്യമാം
ബോധം സസൂക്ഷ്മം പ്രപഞ്ചമെങ്ങും !
ഇല്ലായിരുന്നെങ്കിലീ ബോധ സംഗീത
സംഗമ താള സജീവ സത്യം,
ശബ്ദ ചലനങ്ങളൊന്നുമേയില്ലാത്ത
ശപ്ത നിർജ്ജീവ പദാർത്ഥ പിണ്ഡം
ആദിയന്തങ്ങൾക്കതീത നിരാമയ
താള പ്രവാഹമായീ പ്രപഞ്ചം
ഭൂമിയാം തൊട്ടിലിലെന്നെ തലോടുന്ന
താരാട്ടു പാട്ടിന്റെ മുന്നൊരുക്കം !
കുഞ്ഞു തന്മാത്രകൾ തുന്നിയെടുത്തൊരീ
മഞ്ഞൾ പ്രസാദ മനുഷ്യ ജന്മം
തന്നിലെ സ്നേഹ പ്രകാശത്തെ യുൾക്കൊണ്ട
കുഞ്ഞൊരു തുള്ളി തുഷാര ബിന്ദു !
